Inson huquqlarini himoya qilishda hamkorlik yoʻlga qoʻyiladigan boʻldi

OʻzNNTMA Toshkent viloyat hududiy boʻlinmasi tashabbusi bilan viloyat Yoshlar agentligi majlislar zalida Toshkent viloyatidagi davlat tashkilotlari, biznes sektori va NNT hamkorlarining hamkorligini mustahkamlash, migrantlar, mehnat muhojirlari va odam savdosi qurbonlari huquqlarini himoya qilishda sektorlararo yondashuv boʻyicha hamkorlik, shuningdek, yillik tadbirlar rejasini ishlab chiqish va sheriklik ishlarining kelajakdagi rivojlanishini muhokama qilish maqsadida davra suhbati oʻtkazildi.

Unda OʻzNNTMA Toshkent viloyat hududiy boʻlinmasi mutasaddilari, Oʻzbekiston xalqaro islom akademiyasi, Toshkent viloyati Ichki ishlar boshqarmasi, viloyatda faoliyat yurituvchi NNTlar, Oʻzbekiston “Adolat” SDP Toshkent viloyat Kengashi, Oʻzbekiston Yoshlar agentligi Toshkent viloyat boshqarmasi, Tashabbusni rivojlantirish va qoʻllab-quvvatlash “NIHOL” markazi xodimlari ishtirok etishdi.

Davra suhbati Tashabbusni rivojlantirish va qoʻllab-quvvatlash “NIHOL” markazi yuristi, fasilitator Muxabbat Mirzayeva moderatorligida oʻtkazildi.

Seminarni Oʻzbekiston nodavlat notijorat tashkilotlari milliy assotsiatsiyasi Toshkent viloyati hududiy boʻlinmasi boshligʻi Xolmatov Ibrohim Isroilovich oʻz kirish soʻzi bilan boshlab berdi. U oʻz soʻzida NNTlari faoliyati va ularni davlat tomonidan qoʻllab-quvvatlash masalalarida amalga oshirilayotgan ishlar yuzasidan fikrlarini bildirib oʻtdi.

Seminar ishida Tashabbusni rivojlantirish va qoʻllab-quvvatlash “NIHOL” markazi raisi Shirina Rashidova “NIHOL” HHT faoliyatidan soʻzlovchi taqdimoti yigʻilganlar diqqatiga havola etilib, mazkur markaz direktori Rifat Sariboyevning “Migrant – ahamiyatga ega” loyihasining maqsad va vazifalarini ochib beruvchi tahliliy maʼruzasi tinglandi.

Tadbir yakunida, OʻzNNTMA viloyat hududiy boʻlinmasi boshligʻi Ibrohim Xolmatov hududiy boʻlinma faoliyati, assotsiatsiya aʼzolariga koʻrsatib kelinayotgan amaliy, uslubiy yordamlar hamda 2023-yilga rejalashtirilgan tadbirlar toʻgʻrisida maʼlumot berib oʻtdi.

Oʻzbekiston “Adolat” SDP Toshkent viloyati Kengashi
matbuot xizmati.