Inson manfaati, uning qadr-qimmati — bosh maqsadimiz

Mamlakatimizda oʻtgan yillar davomida barcha sohalarni rivojlantirish borasida koʻplab tizimli islohotlar amalga oshirilib, ijobiy natijalarga erishildi. Biroq, bir qator jabhalarda faoliyatning samarali mexanizmlarni yaratishga toʻsqinlik qilayotgan ayrim muammo va kamchiliklar ham yoʻq emas. 

Aytish joizki, Davlatimiz rahbari Shavkat Mirziyoyev tomonidan 2022-2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisidagi Farmonni imzolanishi ayni davr uchun muhim ahamiyat kasb etadi.

Mazkur Farmonda islohotlarning uzviyligi va davomiyligini taʼminlash maqsadida “Harakatlar strategiyasidan – Taraqqiyot strategiyasi sari” degan tamoyil asosiy gʻoya va bosh mezon qilib olindi.

Xususan, unda erkin fuqarolik jamiyatini rivojlantirish orqali xalqparvar davlat barpo etish, inson qadri-qimmati va uning qonuniy manfaatlarini taʼminlash, adolat va qonun ustuvorligi – xalqchil davlat qurish, inson qadr-qimmatini taʼminlash, milliy iqtisodiyotni rivojlantirish, adolatli ijtimoiy siyosat yuritish, inson kapitalini rivojlantirish, maʼnaviy va maʼrifiy sohalarda islohotlarni amalga oshirish, xalqimizning ogʻirini engil qilish, aholi uchun qoʻshimcha qulayliklar yaratish va ularning xarajatlarini tejash, fuqarolarning pensiya taʼminotini yaxshilash va pensionerlarni qoʻllab-quvvatlash, nogironlikni belgilashda fuqarolarga qoʻshimcha engilliklar yaratish, “Yangi Oʻzbekiston” massivlarini rivojlantirish va aholining uy-joyga boʻlgan talabini qondirish, taʼlim sifatini oshirish, sohani ilgʻor xorijiy tajriba asosida isloh qilish kabi muhim vazifalar belgilangan.

Farmonning eʼtiborli jihatlaridan biri shundaki, kelgusi 5 yillikka moʻljallangan strategiyada birinchi oʻringa shaxs, inson qadri yuqori oʻringa qoʻyilgan. Bir soʻz bilan aytganda, amaliy natija, inson manfaati, uning qadr-qimmati bosh maqsadga aylangan.

Qolaversa, Farmonda yurtimizda yashayotgan har bir fuqaroning huquq va erkinliklari, qonuniy manfaatlari eng oliy qadriyat ekanligiga alohida eʼtibor qaratilgan.

Sharofat QARSHIBOYEVA,
“Adolat” SDP Jizzax viloyat Kengashi faoli.