“Inson qadri” — bosh mezon etib belgilangan

Oʻzbekiston “Adolat” SDP Ellikqalʼa tuman Kengashi hamda tuman kengashi deputatlar ishtirokida “Ellikqalʼa” ovul fuqarolar yigʻinida “Yangilanayotgan Konstitutsiya – inson qadri uchun” mavzusida targʻibot tadbiri oʻtkazildi. Tadbirda Oliy Majlis Qonunchilik palatasi Spikeri oʻrinbosari, Oliy Majlis Qonunchilik palatasidagi partiya fraksiyasi rahbari Z.Ibragimova va “Orol bolalari” xalqaro oʻquv-sogʻlomlashtirish markazi direktori R.Allabergenov ishtirok etishdi. Oliy Majlis Qonunchilik palatasi Spikeri oʻrinbosari Z.Ibragimova oʻz nutqida referendum tushunchasining mazmun-mohiyati, yangilanayotgan Konstitutsiyamizga yurtdoshlarimiz tomonidan 220 mingdan ortiq takliflar bildirilib, ularning aksariyati Konstitutsiyaviy qonun loyihasiga kiritilganligini hamda unda yoshlarga ayniqsa, taʼlim sohasiga alohida eʼtibor qaratilayotganligini va bugungi Konstitutsiyaviy islohotlarda inson qadri bosh omil etib belgilanganligini alohida taʼkidladi.

Fikr va mulohazalarga boy boʻlgan uchrashuv davomida ishtirokchilar oʻzlarini qiziqtirgan savollariga batafsil javoblar olib, joriy yilning 30-aprel kuni boʻlib oʻtadigan referendumga befarq emasliklarini bildirishdi.

Yangilanayotgan Konstitutsiya – har bir yurtdoshimizning huquq va manfaatlarini taʼminlashga, jamiyatda xotin-qizlarning mavqeyini oshirishga, yosh-u qarining xohish va istaklarini amalga oshirishga qaratilgan koʻpgina muhim masallarni oʻz ichiga oladi. Shunday ekan, xalqimiz kelajagiga befarq boʻlmasdan siyosiy jarayonlarda faol ishtirok eting!

Urinboy Karimov,

“Adolat” SDP Ellikqal'a tumani Kengashi raisi.