Inson qadrini ulug‘lagan xalqchil dastur

Mamlakatimizda sud-huquq tizimini isloh qilish, odil sudlovning sifat va samaradorligini oshirish, sudlarning mustaqilligini ta’minlash bo‘yicha keng ko‘lamli ishlar amalga oshirilmoqda.

“Adolat” SDP uchun ham qonunchilik va sud-huquq sohasi doimo muhim ahamiyat kasb etib kelgan. Biz “kuchli va adolatli sud hokimiyati bo‘lgan joyda qonun va adolat tamoyillari ustuvor”, deb hisoblaymiz. Sababi odamlar taqdiri sudyalar qo‘lida ekan, bu lavozimda faqat va faqat adolat yalovini mahkam tutgan insonlar faoliyat olib borishi hayotiy zaruriyatdir.

So‘nggi yillarida barcha sohalarda bo‘lgani kabi sud-huquq tizimida ham keng ko‘lamli islohotlar izchillik bilan amalga oshirib kelinmoqda. Ayniqsa, oxirgi yetti yilda sohaga oid jadallashgan sa’y-harakatlar Prezidentimiz tashabbusi va alohida nazorati doirasida kechayotgani barchamizni quvontirmoqda.

“O‘zbekiston – 2030” strategiyasida ham davlat organlari va mansabdor shaxslarning faoliyati ustidan samarali sud nazoratini o‘rnatish hamda ma’muriy adliya tizimini yanada rivojlantirish ustuvor vazifa sifatida belgilangani alohida ahamiyatga ega. Ayniqsa, ma’muriy sudlarga bevosita murojaat qilishga to‘sqinlik qilayotgan omillarni to‘liq bartaraf etilishi hamda sudga qadar bosqichda nizolarni hal qilish samaradorligini 50 foizga oshirilishini juda to‘g‘ri qaror deb bilamiz.

Hujjatda advokatura instituti salohiyatini tubdan oshirish, shuningdek, malakali huquqiy yordam ko‘rsatish tizimini rivojlantirish maqsadida ushbu institutni o‘z-o‘zini boshqarish tizimiga o‘tkazish hamda uning davlat organlari va boshqa tuzilmalardan chinakam mustaqilligini ta’minlash vazifasi belgilanishi ham inson huquq va qonuniy manfaatlarini samarali himoya qilish jarayonida advokatura institutini roli va o‘rnini oshirishga xizmat qiladi.

Ushbu hayotiy hujjatda advokatlar sonini kamida 2000 nafarga ko‘paytirish, fuqarolik, ma’muriy va iqtisodiy ishlar bo‘yicha advokatlar hamda sudlar, huquqni muhofaza qiluvchi organlar va boshqa davlat organlari o‘rtasida elektron hujjatlar almashinuvi darajasini kamida 50 foizga yetkazish ham aks etganki, bularning barchasi inson huquq va erkinliklarini ta’minlashga zamin yaratadi.

Strategiyaga muvofiq, tadbirkorlik sohasida javobgarlikni yanada liberallashtirish maqsadida birinchi marta jinoyat sodir etgan shaxsni, agar u sud maslahatxonaga kirgunga vadar soliqlar va yig‘imlar, shu jumladan penyalar va boshqa moliyaviy sanksiyalar tarzida davlatga yetkazilgan zararni to‘liq qoplasa, javogarlikdan ozod qilish belgilanmoqda. Bu esa mamlakatimizda faoliyat ko‘rsatayotgan biznes vakillarini huquq va qonuniy manfaatlarini himoya qilish borasida amalga oshirilayotgan islohotlarni yangi bosqichga olib chiqilishiga hamda yanada qulay biznes muhitini yaratilishiga xizmat qilishi shubhasiz.

Umuman olganda, mamlakatni ijtimoiy-iqtisodiy rivojlantirish, inson huquq va erkinliklarini ta’minlashdek masalalarni ushbu huquqiy hujjatda aks etayotgani yurtimizda bu borada amalga oshirilayotgan izchil islohotlarni mutlaqo yangi bosqichga chiqishiga, mazkur yo‘nalishda mamlakatimizni xalqaro reytinglardagi o‘rnini yanada ko‘tarilishiga xizmat qiladi.

Zuxra IBRAGIMOVA,

Oliy Majlis Qonunchilik palatasi

Spikeri o‘rinbosari,

“Adolat” SDP fraksiyasi rahbari