Insonlar salomatligi - dolzarb masala

Aholi salomatligini mustahkamlash hamma vaqt dolzarb masala. Chunki xalq sogʻlom boʻlsa jamiyat sogʻlom boʻladi. Ayni shu maqsadda Davlatimiz rahbarining Oliy Majlis va Oʻzbekiston xalqiga Murojaatnomasida inson salomatligiga eʼtiborni kuchaytirish, tibbiyotni takomillashtirish borasida oldimizga qator vazifalar qoʻyildiki, bu zimmamizdagi masʼuliyatni yanada oshirdi.

Koʻrsatib oʻtilganidek, xalqimizni malakali va sifatli tibbiy xizmatlardan foydalanish imkoniyatlarini yanada kengaytirish, markazlardagi kabi olis hududlarda faoliyat yurituvchi oilaviy shifokorlik punkti va poliklinikalarda ham zamonaviy tibbiy xizmatni joriy etish bugunning talabi. Shundan kelib chiqib biz andijonlik “Adolat”chilar bu masalaga alohida eʼtibor qaratyapmiz

Bugun safimizda tibbiyot xodimlari koʻpchilikni tashkil etadi. Birgina Andijon davlat tibbiyot institutidagi boshlangʻich partiya tashkilotimiz 1400 nafardan ortiq professor-oʻqituvchi va shifokorlarni birlashtirgan. Bu oʻz-oʻzidan saylovoldi dasturimizda belgilangan tibbiyot sohasi bilan bogʻliq vazifalarni bajarishlikda qoʻl kelmoqda.

Aholi salomatligini mustahkamlashda birinchi navbatda tibbiy madaniyatni yuksaltirish, jamoatchilik orasida targʻibot tadbirlarini tashkil etish katta ahamiyatga ega. Shu sabab tibbiyotchi-safdoshlarimiz uchun bu doimiy vazifaga aylangan. Yil boshida belgilangan reja asosida shifokorlar bilan birga Andijon davlat tibbiyot oliygohi talabalaridan iborat volontyorlar doim jamoatchilik orasida. Davra suhbatlarida tibbiy madaniyat, toʻgʻri ovqatlanish va yuqumli kasalliklardan saqlanish haqida soʻz yuritiladi.Tibbiy-ijtimoiy muammolarni oʻrganish barobarida mahallalarda tibbiy koʻrik tashkil etilib kasalliklarni oldi olinmoqda.

Uzoqqa bormaylik, amaldagi yilda fevral oyining birinchi oʻn kunligida Paxtaobod tumani Madaniyat hududida ana shunday tadbir tashkil etildi. Tadbir doirasida birinchi navbatda ijtimoiy himoyaga muhtoj, nogironligi bor, oʻzi yura olmaydigan fuqarolarning xonadonlariga kirib borildi. Tibbiy koʻrik natijalariga koʻra 22 nafar fuqaro davolanishga yoʻnaltirildi, 50 nafar fuqaroga uyda davolanish uchun tavsiyalar berildi.

Tumandagi Chorsu mahallasidagi xonadonlarda, institutning yosh olimlari oʻz ilmiy tadqiqotlari doirasida izlanishlar olib bormoqda. Aniqlangan bemorlarni davolash rejalari tuzilib, davolanish uchun maslahatlar berilyapti.

2022-yilda Andijon shahar, Izboskan, Jalaquduq, Marhamat va Shahrixon tumanlari alohida eʼtiborimizda boʻldi. Ana shu hududlarda oʻtkazilgan tibbiy koʻrik tadbirlari natijasida 1200 nafardan ortiq bemor sogʻlomlashtirildi. Jamoatchilik orasida olib borilgan davra suhbati va soʻrovnomalar fuqarolarning oʻz salomatligiga boʻlgan eʼtiborini oshirdi.

Dunyoning boshqa mintaqalarida kuzatilayotgan turli yuqumli kasalliklar, u bilan bogʻliq xavf-xatarlar hammamizni yanada hushyor va ogoh boʻlishga undamoqda. Prezidentimiz taʼkidlanganlaridek, aholi salomatligini asrash va mustahkamlash borasidagi tub islohotlarimizni yangi bosqichga koʻtarish zarur.

Madaminjon Madazimov,
“Adolat” SDP Andijon viloyat kengashi raisi.