Iqtidorlilarga qachon sharoit yaratiladi?

Oliy Majlis Qonunchilik palatasi deputati Mavluda Adhamjonova oʻz saylov okrugi hududidagi ijtimoiy soha obyektlarini oʻrganishda davom etmoqda. Ayni shu maqsadda Andijon tumani, Gulobod MFYdagi 32-maktabda boʻlgan xalq vakili dastlab, mazkur taʼlim muassasasi faoliyati bilan qiziqdi.

Taʼlim samaradorligini oshirish, kelajagimiz egalarini komil insonlar qilib kamolga yetkazish yoʻlida olib borilayotgan ishlar ibrat olarli.

Prezidentimiz yaqinda Andijonga tashrifi chogʻida taʼkidlaganlaridek, oʻquvchilarni maktab davridayoq kasbga yoʻnaltirish ham tizimli yoʻlga qoʻyilgan. Darsdan soʻng ular oʻzlari qiziqqan yoʻnalishda hunar oʻrganishlari mumkin.

Birgina misol, tadbirkor Maʼrufjon Soliyev koʻmagi bilan maktabda tashkil etilgan goʻzallik saloni oʻquvchi-qizlar bilan doim gavjum. 7-sinf oʻquvchisi Robiya Abdumajidova qisqa vaqtda bu hunarni oʻrganib, endilikda tengdoshlariga ustozlik qilmoqda. Boshqa sohalarda ham yoshlar oʻz iqtidorlarini koʻrsatmoqda.

Biroq ana shu iqtidor egalari uchun barcha sharoitlar mavjud, deb aytib boʻlmaydi. Maktab taʼmirtalab, bu borada masʼullar nimagadir bosh qotirmayapti chogʻi. Hatto oʻquvchilar uchun oshxona mavjud emas. Agar shu kabi kamchiliklar bartaraf etilsa, iqtidorlilar safi yanada kengayishi aniq.

Zumradoy Soliyeva,
Oliy Majlis Qonunchilik palatasi deputati yordamchisi.