Ishdan boʻshatish nafaqasi qanday toʻlanadi?

Mehnat munosabatlarining qonuniy tartibda oʻrnatilishi har qanday muassasada ishlovchilar uchun ahamiyatli. Yangi tahrirdagi Mehnat kodeksida ayni shu masala alohida koʻzda tutilgani bejiz emas. Oliy Majlis Qonunchilik palatasi deputati Mavluda Adhamjonova ishtirokida Andijon tumani Aholi bandligiga koʻmaklashish markazida tashkil etilgan davra suhbatida ayni shu mavzuda soʻz yuritildi.

Dastlab deputat tomonidan mehnat munosabatlari boʻyicha amaldagi qonunchilik, yangi Mehnat kodeksini qabul qilish zarurati va kiritilayotgan oʻzgartishlar haqida tushuncha berdi. Bu ayni vaqtda markaz xodimlari zimmasidagi masʼuliyatni yanada oshirishini koʻrsatib oʻtdi. Korxona va tashkilotlardagi masʼul xodimlarning bilim va malakalarini ham oshirish zarur.

Mavluda Adhamjonova, Oliy Majlis Qonunchilik palatasi deputati:

-Mehnat qonunchiligining buzilishi koʻp hollarda xodimni ishdan boʻshatish vaqtida yuzaga keladi. Aniqroq qilib aytganda ishdan boʻshatish nafaqasini toʻlashda muammolar kelib chiqadi. Shu sabab yangi Mehnat kodeksining173-moddasi bilan bu masalaga aniqlik kiritildi. Unga koʻra ishdan boʻshatish nafaqasining miqdori mazkur ish beruvchidagi ish stajiga bogʻliq boʻladi. Xodim qancha koʻp ish stajiga ega boʻlsa nafaqa shuncha koʻp belgilanadi. Amaldagi Mehnat kodeksida ishdan boʻshatish nafaqasining miqdori oʻrtacha oylik ish haqidan kam boʻlishi mumkin emasligi belgilangan. Markaz xodimlari bu borada mehnat jamoalarida tushuntirish ishlarini olib borishi maqsadga muvofiqdir.

Davra suhbatida yuqoridagilardan tashqari ishga joylashtirish, dastlabki sinov muddati, dam olish kunlari va shu kabi boshqa masalalar xaqida ham fikr almashildi.

Zumradoy Soliyeva,
Oliy Majlis Qonunchilik palatasi deputati yordamchisi.