Ishonchli vakil Guliston shahri tibbiyot xodimlari bilan uchrashdi

Bugun “Adolat” sotsial-demokratik partiyasi tomonidan Prezidentlikka nomzod sifatida koʻrsatilgan Robaxon Maxmudovaning saylovoldi dasturi targʻibotiga bagʻishlangan uchrashuvlar Guliston shahrida markaziy poliklinikasida davom etdi.

Uchrashuvda mahalla faollari, mehnat faxriylari, deputatlar, partiya faollari, yoshlar, xotin qizlar, keng jamoatchilik va OAV vakillari ishtirok etishdi.

Tadbirni Oʻzbekiston “Adolat” sotsial-demokratik partiyasi Sirdaryo viloyat Kengashi rais Jamol Komilov kirish soʻzi bilan ochib berdi.Yurtimizdagi siyosiy jarayonlar toʻgʻrisida toʻxtalib, uchrashuv qatnashchilarini 2023-yil 9-iyul kuni Prezidentlikga boʻlib oʻtadigan saylovlarda faol qatnashib, siyosiy huquqlaridan foydalanishga, befarq boʻlmaslikka chaqirdi.  

Uchrashuvda nomzodning Sirdaryo viloyatidagi ishonchli vakili Nodira Djanibekova nomzodning saylovoldi dasturida ilgari surilgan tashabbuslarning mazmun-mohiyatini tushuntirib berdi.

Xususan, nomzodning tarjimai holi bilan tanishtirdi va saylovoldi dasturidagi tibbiyot sohasini rivojlantirishga qaratilgan kelgusida ustuvor vazifalar borasida maʼlumotlar berdi.

Jumladan, “aqlli tibbiyot” tizimini shakllantirishning huquqiy asoslarini ishlab chiqib, tibbiyot sohasiga zamonaviy axborot kommunikatsiya texnologiyalarini keng joriy etishni kengaytirish tarafdorimiz.

Shu bilan birga, sogʻliqni saqlash tizimini ijtimoiy davlat tamoyiliga muvofiqlashtirgan holda “Oʻzbekiston Respublikasining Sogʻliqni saqlash kodeksi” loyihasini yanada takomillashtirish, unda, sogʻliqni saqlash sohasida inson huquqlariga rioya qilish, aholining barcha qatlamlari tibbiy yordamdan bahramand boʻlishini taʼminlash masalalariga alohida eʼtibor qaratish lozim, deb hisoblaymiz.

Ayniqsa, nodavlat tibbiyot tashkilotlarini tijorat tashkilotidan notijorat tashkilotiga oʻtkazish boʻyicha amaliy choralarni koʻramiz. Tibbiyot daromad olish manbaiga aylanmasligi tarafdorimiz.

Biz tibbiyot xodimlarining maqomini qonun bilan belgilaymiz, ularning ijtimoiy himoyasini kuchaytirish va ularga nisbatan turli tazyiqlarning oldini olish maqsadida qonunchiligimizni yanada takomillashtiramiz.

Tibbiyot sohasida malaka oshirishning markazlashgan tizimini qayta koʻrib chiqishni, malaka oshirishni ixtisoslashgan markazlarda va viloyatlarda tashkil etishni taklif etamiz.

Shuningdek, reproduktiv salomatlik masalasi, onkologiya, sil, qand kasalliklarining oldini olish va davlat hisobidan davolash alohida diqqat-eʼtiborimizda boʻladi.

Biz onalik va bolalikni muhofaza qilishga alohida eʼtibor qaratamiz. Onalar va bolalar oʻlimini, bolalarning nuqsonli tugʻilishini oldini olish borasidagi ishlarni takomillashtiramiz.

Biz, aholi, ayniqsa yoshlar oʻrtasida sogʻlom turmush tarzini yanada ommalashtirish, jismoniy-tarbiya va sportni rivojlantirishga birlamchi vazifa sifatida eʼtibor qaratamiz.

Bunda har bir fuqarolar yigʻini hududida sport bilan shugʻullanish uchun zarur shart-sharoitlar yaratish muhim ahamiyat kasb etadi.

Bizning sogʻliqni saqlash sohasidagi ustuvor maqsadlarimizdan yana biri qishloqda va taʼlim tizimida tibbiy xizmatni sifat jihatidan yangi bosqichga koʻtarishdir.

Uchrashuvda saylovoldi dasturidan oʻrin olgan boshqa vazifalar xususida ham ishtirokchilar tomonidan fikr va mulohazalar bildirildi, saylovchilar dastur boʻyicha   oʻzlarini qiziqtirgan savollarga ishonchli vakil tomonidan javob olishdi. Uchrashuv yakunida ishonchli vakil barchani Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudova ovoz berishga chaqirdi.

“Adolat” SDP Sirdaryo viloyat Kengashi   Matbuot xizmati.