Ishonchli vakil payariqlik saylovchilar bilan uchrashdi

“Adolat” sotsial-demokratik partiyasidan Oʻzbekiston Respublikasi Prezidentligiga nomzod Robaxon Mahmudovaning Samarqand viloyatdagi ishonchli vakili Muzaffara Abdieva Payariq tumanidagi saylovchilar bilan uchrashdi.

Uchrashuvda tuman deputatlari, tibbiyot xodimlari, partiya faollari, yoshlar hamda ommaviy axborot vositalari xodimlari ishtirok etishdi.

Ishonchli vakil tomonidan nomzod Saylovoldi dasturida toʻqqizta yoʻnalish boʻyicha amalga oshiriladigan ishlar belgilab olingani, dasturda “Adolat” sotsial-demokratik partiyasining dasturlariga hamohang va uygʻun bu yoʻnalishlarda Vatanimiz taraqqiyoti yoʻlida demokratik, huquqiy, ijtimoiy davlat va barcha uchun farovonlik taʼminlangan adolatli fuqarolik jamiyatini qurish maqsadi bayon etilganini qayd etib oʻtildi.

Tadbir davomida nomzodning Saylovoldi dasturida, “Aqlli tibbiyot” tizimini shakllantirish, jamiyatda oʻqituvchilar maqomini oshirish, subsidiyalar berish tizimini yanada takomillashtirish va maqsadli ishlatilishi ustidan jamoatchilik nazoratini kuchaytirish, bojxona va soliq imtiyozlarini takomillashtirish, imtiyozlarni aniq sohalarga berish, hududlar oʻrtasidagi iqtisodiy bir xil oʻsishni taʼminlash, barcha tuman va shaharlarni bir maromda rivojlantirishga qaratilgan gʻoyalar ishtirokchilarda katta qiziqish uygʻotdi. Uchrashuv savol-javob, fikr -mulohazalarga boy tarzda yakunlandi.

Ergashov Bobur,

Xalq deputatlari Samarqand shahar Kengashi deputati.