Ishonchli vakil qorakoʻllik saylovchilar bilan uchrashdi

Xotin-qizlarning bandligini taʼminlash, mehnat sharoitlarini yaxshilash, ayniqsa, qishloq joylaridagi xotin-qizlarni oilaviy va xususiy tadbirkorlikka, hunarmandchilikka keng jalb etishga alohida eʼtibor qaratamiz — Robaxon Maxmudova.

Qorakoʻl tuman Tibbiyot texnikumi faollar zalida Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Mahmudovaning Buxorodagi ishonchli vakili qorakoʻllik saylovchilari bilan uchrashdi.

Tadbirda Oliy Majlis Qonunchilik Palatasi deputati T.Choriyev, partiyaning mahalliy Kengash deputatlari, taʼlim, tibbiyot sohasi vakillari, mahalla faollari, saylovda ilk bor qatnashuvchi yoshlar, hamda ommaviy axborot vositalari vakillari ishtirok etishdi.

Robaxon Anvarovnaning viloyatdagi ishonchli vakili Maqsud Hamidov soʻzga chiqib, yigʻilganlarni nomzodning hayoti va faoliyati bilan tanishtirdi. Shundan soʻng nomzodning saylovoldi dasturi yigʻilgan ishtirokchilarga batafsil tanishtirdi.

Xususan, saylovoldi dasturda keltirilgan, adolatli jamiyat va huquqiy davlat qurish jarayonida ayollar va erkaklarning teng huquqliligini taʼminlash, xotin-qizlarning ijtimoiy-siyosiy faolligini oshirish, ularning turli soha va tarmoqlarda oʻz qobiliyat va imkoniyatlarini roʻyobga chiqarishi uchun shart-sharoitlar yaratish masalalariga alohida eʼtibor qaratilganligini toʻxtalib oʻtdi.

Bundan tashqari uchrashuv chogʻida, bogʻchalarda jamoatchilik nazoratini kuchaytirish zarurligi, ayniqsa, maktabgacha va maktab taʼlimi mamlakat kelajagi uchun hal qiluvchi ahamiyatga egaligidan kelib chiqib, barcha bogʻcha va maktablarga xodimlarni ishga olishni, ochiq shaffof va tanlov asosida tashkil qilish koʻzda tutilganligi taʼkidlandi.

Savol-javoblarga boy boʻlgan targʻibot tadbiri soʻngida ishonchli vakil saylovchilarning qiziqtirgan savollariga aniq va batafsil javoblar berdi.

Mohigul Rahimqulova,

“Adolat” SDP Buxoro viloyat Kengashi matbuot kotibi.