Ishonchli vakil tomdilik saylovchilar bilan uchrashdi

Oʻzbekiston “Аdolat” SDP dan Oʻzbekiston Respublikasi Prezidentligiga koʻrsatilgan nomzod Robaxon  Maxmudovaning Navoiy viloyatidagi ishonchli vakili, xalq deputatlari Navoiy viloyat kengashi deputati, partiyaning viloyat Kengashi raisi Rustam Xayitov Tomdi tumanidagi saylovchilar bilan uchrashdi.

Tuman madaniyat markazida tashkil etilgan uchrashuvda madaniyat sohasi vakillari, xalq deputatlari tuman kengashi deputatlari, partiya faollari, oʻqituvchilar, tibbiyot sohasi vakillari, yoshlar va ommaviy axborot vositalari vakillari ishtirok etdi.

Tadbir davomida, nomzod dasturida huquqiy davlat qurish, ijtimoiy adolatni qaror toptirish, milliy iqtisodiyot, ilm fan, innovatsiyalar va taʼlim sohasining barqaror oʻsishiga erishish, aholi salomatligini har tomonlama muhofaza qilish, fuqarolik jamiyatini rivojlantirish, atrof-muhitni asrash, xotin-qizlar va yoshlarning siyosiy faolligini oshirish kabi ustuvor vazifalar oʻrin olganligi urgʻulandi.

Аhamiyatlisi, viloyat markazidan 250 km olis choʻl hududi hisoblangan koʻp millatli tuman saylovchilari tomonidan nomzodning saylovoldi dasturidan oʻrin olgan masalalar katta qiziqish uyg’otdi.

Fikr va mulohazalarga boy boʻlgan uchrashuv soʻngida saylovchilar ozlarini qiziqtirgan  savollarga ishonchli vakil tomonidan batafsil javoblar olishdi.

Oʻzbekiston Respublikasi Prezidentligiga nomzod Robaxon Maxmudovaning ishonchli vakili Rustam Xayitovning viloyatimiz boʻylab saylovchilar bilan uchrashuvlari davom etmoqda.

Nasiba Begimatova,

“Аdolat” SDP Tomdi  tuman Kengashi raisi.