Islohotlar inson qadri uchun

Bugun barcha saʼy-harakatlar, muxtasar aytganda, inson qadrini yuksaltirishga qaratilgan ekan, Bosh qomusimizga kiritilayotgan barcha oʻzgartishlarning negizida ham Oʻzbekistonda kechayotgan islohotlar mohiyatini belgilovchi “Inson qadri uchun” ulugʻvor gʻoyasi yotganligini koʻrishimiz mumkin. Konstitutsiyaviy oʻzgarishlarning asl mohiyati ham shu aslida. Chunki xalqimiz hozirgi tarixiy islohotlarning mazmun-mohiyatini toʻla anglab yetmoqda. Xalq fikrini oʻrganish asosida mamlakat konstitutsiyasini takomillashtirish yurtimizda amalga oshirilayotgan islohotlarni yangi sifat darajasiga koʻtarish, xalqimizning turmush farovonligini yanada oshirish, Oʻzbekistonning dunyodagi eng ilgʻor davlatlari qatoriga kirishiga ulkan imkoniyatlar yaratadi. Shu ezgu gʻoyalarni oʻzida mujassam etayotgan koʻplab tadbirlar yurtimiz boʻylab tashkil etilib kelinmoqda.

Tayloq tuman 22-umumtaʼlim maktabida pedagog-xodimlar va oʻquvchilar bilan konstitutsiyaviy oʻzgarishlarga va 30-aprel kuni boʻlishi kutilayotgan Referendumga bagʻishlangan maʼnaviy-maʼrifiy targʻibot tadbiri boʻlib oʻtdi. Tadbirda maktab direktori, Xalq deputatlari Samarqand viloyat kengashi deputati Dilafruz Ulugʻboyeva referendum, yangilanayotgan Konstitutsiyaning mazmun-mohiyati, ayrim moddalari, ularning ahamiyati, konstitutsiyada yoshlar, oʻqituvchilar, xotin-qizlar, tadbirkorlar, barcha fuqarolarning haq-huquqlari kafolatlanayotganligi toʻgʻrisida oʻz fikrlarini bildirdi.

Tadbir soʻngida barcha yigʻilganlar oʻzlarini qiziqtirgan savollarga javoblar olishdi va dastur oʻquvchi yoshlarning chiqishlari bilan yakun topdi.

Mahliyo Nosirova,

Xalq deputatlari Tayloq tuman Kengashi deputati.