Islohotlar samaradorligini oshirishning muhim omili

Keyingi yillarda respublikamizda barcha sohalarda sezilarli oʻzgarishlar kuzatilmoqda. Yangi Oʻzbekistonni barpo etish va taraqqiyoti yoʻlida amalga oshirilayotgan islohotlarda jamoatchilikning faol ishtiroki va bu borada qabul qilinayotgan qonun hujjatlari barchamizni befarq qoldirmaydi.

Shu maʼnoda aytish mumkinki, amaldagi yilda oʻtkazilgan siyosiy voqeliklar fuqarolik jamiyatining rivojlanib borayotgani, yurtdoshlarimizning huquqiy madaniyati yuksalayotganini oʻzida ifoda etdi. 30-aprelda referendumda ovoz berish orqali yangi tahrirdagi Konstitutsiyamizning qabul qilingani va unga asosan oʻtkazilgan prezidentlik saylovi saylovi yana bir bor jamiyatimizning siyosiy yetukligi, yangi Oʻzbekistonni barpo etish yoʻlida amalga oshirilayotgan islohotlarni xalqimiz toʻliq qoʻllab-quvvatlaganidan dalolat bermoqda.

Bugun jamoatchilik tomonidan qoʻllab-quvvatlanayotgan “Oʻzbekiston — 2030” strategiyasi bu borada yana bir dadil qadam boʻldi. Mazkur hujjat xalqimizning erkin va farovon, qudratli yangi Oʻzbekistonni barpo etish boʻyicha xohish-irodasini roʻyobga chiqarish, har bir fuqaroga oʻz salohiyatini rivojlantirish uchun barcha imkoniyatlarni yaratish, sogʻlom, bilimli va maʼnaviy barkamol avlodni tarbiyalash, adolat, qonun ustuvorligi, xavfsizlik va barqarorlikni kafolatli taʼminlashga qaratilgan.

“Oʻzbekiston — 2030” strategiyasi 5 ta ustuvor yoʻnalish hamda 100 ta maqsaddan iborat boʻlib, belgilangan vazifalar jamiyatimiz rivojiga xizmat qiladi. Jumladan, taʼlim va tibbiyot sohalarida eng ustuvor yoʻnalish sifatida har bir insonga oʻz salohiyatini roʻyobga chiqarishi uchun munosib sharoitlarni yaratishdan iborat.

Aniqroq qilib aytganda, maktabgacha, umumiy oʻrta, professional va oliy taʼlim muassasalarini yanada rivojlantirish, ayniqsa barcha yoʻnalishlarda innovatsion faoliyatni keng joriy etish, ilmiy tadqiqotlarni har tomonlama qoʻllab-quvvatlashga qaratilgan maqsad-vazifalar hamda ularning amaldagi ijrosini taʼminlash muhim vazifa sifatida belgilandi. Ushbu tizimdagi islohotlar bilan tanishar ekanmiz, jumladan umumtaʼlim maktablari faoliyatida 2030-yilgacha roʻy beradigan oʻzgarish va yangilanishlar zamirida mamlakatimiz taraqqiyotining shundan keyingi bosqichlarida faoliyat yuritadigan yetuk, salohiyatli yosh avlodni tarbiyalashga qaratilgan dolzarb vazifalar belgilanganligiga amin boʻlamiz. Taʼlim tizimi bilan bogʻliq 7-maqsad oliy taʼlim bilan qamrovni kengaytirish, oliy maʼlumotli mutaxassislar tayyorlash sifatini oshirish, 8-maqsad oliy taʼlim muassasalari tashkiliy boshqaruv faoliyatini takomillashtirish, ularning moddiy-texnik taʼminotini mustahkamlash va 12-maqsad barcha yoʻnalishlarda innovatsion faoliyatni keng joriy etish, ilmiy tadqiqotlarni va innovatsion tashabbuslarni qoʻllab-quvvatlashdan iborat.

Albatta mazkur hujjat bilan aholi salomatligini taʼminlash yoʻlidagi islohotlar izchil davom ettiriladi. Ayni shu maqsadda aholining oʻrtacha umr davomiyligini oshirish, birlamchi tibbiy xizmatlarni yanada yaqinlashtirish, bolalar oʻrtasidagi irsiy kasalliklarning oldini olish
va davolash samaradorligini oshirish, onalar va bolalar oʻlimini qisqartirish, sogʻlom bolalikni taʼminlash yoʻlida amalga oshirilayotgan ishlar yanada kuchaytiriladi. Oʻz oʻrnida onkologik kasalliklarni erta aniqlash, oʻlim koʻrsatkichini kamaytirish va yuqumli boʻlmagan kasalliklar profilaktikasi samaradorligini oshirish zarur..

Kasallikni davolagandan koʻra uni oldini olish hamma vaqt dolzarb vazifa sanaladi. Buning uchun soha xodimlari bilan birga jamoatchilik ham birgalikda kurashmogʻi lozim. 19-maqsad sogʻlom va faol keksalikni taʼminlash, 20-maqsad aholi orasida toʻgʻri ovqatlanish va sogʻlom turmush tarzini shakllantirishga qaratilgani bejiz emas. Bu borada ijobiy natijaga erishish uchun tibbiy madaniyatni ham oshirish maqsadga muvofiqdir.

Bugun har bir sohada rivojlanish. Davr barchamizdan tezkorlikni talab qilmoqda. 21-maqsad bilan tibbiyot sohasida raqamli texnologiyalarni keng joriy qilish vazifa qilib qoʻyildiki bu soha xodimlari zimmasidagi masʼuliyatni yanada oshirdi. Endi ilgarigidek qarash bilan ishlab boʻlmaydi. Izlanish va izlanganda ham raqamli texnologiyalar bilan jahonga yuz tutib ishlashimiz shart.

Umuman olganda, taraqqiyotimizning yangi bosqichi belgilangan “Oʻzbekiston — 2030” strategiyasidagi barcha maqsad va chora-tadbirlarni oʻz vaqtida va samarali bajarilishiga barcha birdek masʼul. Chunki bu ertangi kunimiz yanada farovon boʻlishining asosi demakdir.

Madaminjon Madazimov,

“Adolat” SDP Andijon viloyat kengashi raisi.