Izlanuvchan safdoshimiz tibbiyot rivoji yoʻlida

Bugungi kun yoshlari iqtidorli, ixtirochi, izlanuvchan, omadli. Ularning oʻqib-izlanishlari, kasb egallashlari va yurtimizni dunyoga tanitishlari uchun sharoitlar yetarli. Xorijiy tillarni bilishlari zamon bilan hamnafasliklaridan dalolat.

Andijonlik “Yosh adolatchi” — “Mard oʻgʻlon” davlat mukofoti sovrindori Islombek Bektoshev ana shunday izlanuvchan yoshlardan. Uning qoʻlga kiritayotgan yutuqlari tengdoshlari uchun ibrat olarli. Shu sabab partiyadoshimizni izlanishlari bilan qiziqdik:

— Bolalikdan tibbiyot sohasiga qiziqaman. Andijon davlat tibbiyot institutida tahsil olish mobaynida fan toʻgaraklariga qatnadim, ustozlarimdan bilim olish va ilmiy izlanishlar olib borish barobarida tibbiyot sohasida yangiliklar yaratishni niyat qildim.

Insonlar salomatligini onam mehri bilan qiyoslayman. Vatanimning manfaatlarini har qayerda, har qanday sharoitda bor kuchim bilan himoya qilaman. “Mard oʻgʻlon” davlat mukofoti, diplom va Prezidentimizning sovgʻasini ota-onamga taqdim etdim. Oilamiz xursandchiligini soʻz bilan ifodalay olmayman. Ushbu mukofot orzularimning ushalishiga zamin yaratdi.

Davlatimiz tomonidan biz yoshlarga katta imkoniyatlar berilyapti. Buning yaqqol misolini men oʻzimda koʻrdim. Ayni paytda magistraturada oʻqiyapman. Ilk ixtiroim- “Quvnoq oyoqchalar” nomli innovatsion oyoq kiyim yaratdim. Bu qandli diabeti bor bemorlarda kasallikning asorati boʻlgan diabetik toʻpiq sindorimini oldini oladi va davolaydi. Hozirda dunyo miqyosida oyoq amputatsiyasi, yaʼni oyoqni kesib tashlash operatsiyasining 70 foizi shu kasallik sabab kelib chiqadi. Bu ixtirodan olingan natijalar asosida bir nechta ilmiy maqola va tezislarim mahalliy va xalqaro jurnallarda chop etildi. Shu izlanishlar asosida menda yaratuvchanlik hissi yanada kuchaydi.

Yana bir ilmiy izlanishlarim natijasi “MedKlean” deb nomlangan innovatsion paqircha tibbiyot sohasida pandemiya davrida juda zaruriy uskunaga aylandi. U bir martalik tibbiy asbob — uskunalarni zararsizlantirish uchun katta imkoniyat yaratdi. Shuningdek, talabalarning oʻqish davomida inson jasadida amaliyot oʻtay olmasligi sababli, ularga stimulyator kerak. Shu sabab ilk stimulyator uskunam “Imkon” laparaskopik trenajorlarini yaratdim. U talaba va izlanuvchilar uchun katta imkoniyat yaratdi. Ushbu uskunadan foydalanuvchilar 8 bosqichli amaliyotni oʻzlashtirgan holda laparoskopdan foydalanishlari va jarroh yordamchisi boʻlishi mumkin.

Yangilik yaratish uchun insonda xohish boʻlsa bas. Oldiga aniq maqsadni qoʻysa imkoniyatlar bor.

Nilufar Yoʻldosheva,

“Adolat” SDP Andijon shahar kengashi faoli.