Jamiyat rivoji olimlar bilan

Har qanday jamiyatning rivojida ilm-fan, aniqrogʻi uning asoschilari boʻlgan olimlarning oʻrni katta. Shu maʼnoda yangi Oʻzbekistonning kelajagini ham ilm odamlarisiz tasavvur etib boʻlmaydi.

Oʻzbekiston “Adolat” SDP oʻz saylovoldi dasturida bu masalaga alohida eʼtibor qaratgani ham bejiz emas. “Adolatchilar” jamiyat rivojini olimlar bilan birga koʻradi. Partiyaning Andijon shahar kengashi tashabbusi bilan Andijon davlat universitetida oʻtkazilgan davra suhbati ayni shu mavzuga bagʻishlandi.

Oliygoh olimlari va izlanuvchan talabalar ishtirokidagi tadbir avvalida Oʻzbekiston “Adolat” SDP Andijon viloyati kengashi raisi oʻrinbosari Maloxatxon Musayeva partiyaning oʻz oldiga qoʻygan maqsad va vazifalari hamda partiya loyihalari toʻgʻrisida tushuncha berdi. Ayni vaqtda partiya aʼzolari orasida ilm-fan fidoyilari koʻpchilikni tashkil etishini taʼkidladi.

Tadbirda soʻz olgan olimlar har qanday soha rivoji ilm-fan bilan bogʻliqligi, ixtirolar taraqqiyotga xizmat qilishi va qonun ustuvorligi haqida oʻz fikrlarini bildirdilar. Bugungi yoshlarga qarata bu borada oldinda turgan vazifalar, bilimli insonlar hamma vaqt qadrlanishi va davlatimiz tomonidan izlanuvchilarga boʻlgan eʼtibor koʻrsatib oʻtildi.

Abdulhay Sobirov, filologiya fanlari doktori, professor:

-“Adolatchilar”ning tashabbusini qoʻllab-quvvatlayman. Chindan ham jamiyatning rivojini ilmli insonlarsiz koʻrib boʻlmaydi. Keyingi vaqtda Davlatimiz rahbari tomonidan olimlarga alohida eʼtibor qaratilayotgani, qoʻllab-quvvatlanayotgani bejiz emas. Tilshunos sifatida men birgina til toʻgʻrisidagi qonunlar ijrosi, tilimizning sofligi borasida koʻp ishlar amalga oshirilayotganiga qaramay oldimizda katta vazifalar turganini aytmoqchiman.

Tadbir yakunida olimlar tomonidan ishtirokchilarni qiziqtirgan savollarga javob berildi. “Adolat” SDP Andijon viloyat kengashi qoshida “Olimlar klubi”ni tashkil etishga kelishib olindi.

“Adolat” SDP Andijon viloyati kengashi

Matbuot xizmati.