Jamiyatimizning turli sohalarini isloh qilishga doir qonun loyihalari ko‘rib chiqildi

Oliy Majlis Qonunchilik palatasidagi “Adolat” SDP fraksiyasining yig‘ilishida jamiyatimizning turli sohalarini isloh qilishga doir bir qator qonun loyihalari ko‘rib chiqildi.

Xususan, “O‘zbekiston Respublikasining Jinoyat, Jinoyat-protsessual kodekslariga hamda O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonun loyihasi qizg‘in muhokama qilindi.

Taklif etilayotgan qonun loyihasiga O‘zbekiston Respublikasining Jinoyat kodeksiga axborotni nooshkora tarzda to‘plashga ixtisoslashgan maxsus vositalarni O‘zbekiston Respublikasiga olib kirish, ishlab chiqarish, saqlash, o‘tkazish va foydalanish qilmishlari uchun ma’muriy va jinoiy javobgarlik choralarini belgilovchi normalar kiritilmoqda.

Shuningdek, bank kartasi yoki boshqa to‘lov kartalarini qalbakilashtirish yoki ulardan foydalanish holatlariga hamda bank kartasi yoki boshqa to‘lov kartalarini, shuningdek ichiga mikrosxema o‘rnatilgan identifikatsiyalash modullarini qalbakilashtirishga mo‘ljallangan maxsus texnika vositalarini olib kirish, tayyorlash, saqlash, o‘tkazish yoki ulardan foydalanish harakatlari uchun jinoiy javobgarlik belgilanyapti.

Mobil qurilmaning xalqaro o‘ziga xos identifikatsiya kodini yoki abonent qurilmasining identifikatsiyalash modulini qonunga xilof tarzda o‘zgartirish harakatlari uchun dastlab ma’muriy, ushbu qilmish bir yil davomida takroran sodir etilganda jinoyat javobgarlik belgilanishi nazarda tutilmoqda.

Deputatlarning fikricha, qonun loyihasining qabul qilinishi axborot-kommunikatsiya texnologiyalaridan foydalangan holda sodir etilayotgan yangi turdagi jinoyatlarning oldini olishga hamda javobgarlikning muqarrarligini ta’minlashga xizmat qiladi.

Fraksiya azolari qonun loyihasini “Adolat” SDP maqsad va g‘oyalari bilan uzviy bog‘liq holda ishlab chiqilgani, uning qabul qilinishi jamiyatimizda qiyin ahvolda qolayotgan fuqarolarimizning huquqlarini himoya qilishga xizmat qilishini qayd etdilar.

Shu bilan birga, deputatlar qonunning yuqori sifati va barqarorligiga erishish, ularni hayotga tatbiq etishning ishonchli mexanizmini yaratish partiyaning dasturiy vazifasi bilan hamohang ekanligini e’tirof etgan holda, qonun loyihasini qo‘llab-quvvatladilar.

Yig‘ilish yakunida muhokama etilgan qonun loyihalarini maromiga yetkazish yuzasidan deputatlarning partiya pozitsiyasidan kelib chiqadigan taklif, mulohazalari tinglandi va fraksiyaning nuqtai nazari belgilab olindi.