Jamoatchilik nazorati: Dorixonalardagi dorilar ishonchlimi?

Davlatimiz rahbarining 2022-yil 26-oktyabrdagi “Aholini sifatli dori vositalari va tibbiy buyumlar bilan taʼminlash yuzasidan qoʻshimcha chora-tadbirlar toʻgʻrisida”gi Qarori aholi va tibbiyot tashkilotlarining sifatli dori vositalari hamda tibbiy buyumlar bilan taʼminlanganlik darajasini oshirish, sohada faol jamoatchilik nazoratini olib borish uchun shart-sharoitlar yaratishga qaratilgan. Mazkur Qaror bilan davlat roʻyxatidan oʻtkazilgan belgilangan dori vositalaridan tashqari boʻlgan dori vositalari savdosiga chek qoʻyildi. Shuningdek, dori vositalarining retsept boʻyicha va retseptsiz berilishi ularning tibbiyotda qoʻllanilishiga doir yoʻriqnomalarda belgilangan tartibda amalga oshirilishi koʻrsatib oʻtildi.

Ijtimoiy tarmoqlarda ayrim turdagi dori vositalari insonlar salomatligiga zarar yetkazgani haqida xabarlar tarqaldiki, bu esa ayni masalaning dolzarbligini oshirdi. Xoʻsh, bugun dorixonalarda sotilayotgan dori vositalari ishonchlimi? “Adolat” SDP Jalakuduk tuman Kengashi faollari va mahalliy kengash deputatlari tomonidan yuqoridagi savolga javob topish maqsadida tuman hududidagi dorixonalar faoliyati oʻrganildi. Bunda sotuvdan chiqarilgan dori-darmonlarning muomalaga chiqarmaslikka alohida eʼtibor qaratildi.

Jumladan, “Shifo” xususiy dorixonasi xamda 24-OPdagi ijtimoiy dorixonada savdoda boʻlgan dori vositalari koʻrib chiqildi. Hammasi belgilangan tartibda. Shunday boʻlsa-da, soha xodimlariga sifatsiz dori vositalari savdosiga yoʻl qoʻymaslik, narxlarning bir xilligini taʼminlash va ayrim turdagi taqiqlangan preparatlarni Oʻzbekistonda sotuvi toʻxtatilganligi boʻyicha tushuncha berildi.

Toʻydixon Aliboyeva, Oliy Majlis Qonunchilik palatasi deputati yordamchisi:

- Aholi salomatligi hamma vaqt dolzarb vazifa. Shu sababli biz bu borada doim jamoatchilik nazorati tartibida oʻrganish ishlarini olib boramiz. Dorixonalarga kelsak, oxirgi kunlarda fuqarolarimizda dorilarni sotib olishda ikkilanish paydo boʻldi. Natijada dori va dori vositalari savdosini oʻrganishga qaror qildik. Chunki arzimas sabab kimnidir salomatligiga ziyon yetkazmasligi kerak.

Siz ham bu borada masʼuliyatli boʻling, dori va dori vositalarini sotib olishda shifokor maslahatiga amal qiling!

“Adolat” SDP Andijon viloyat kengashi

Matbuot xizmati.