Jazoni ijro etish koloniyasida referendum oldi targʻiboti

Oʻzbekiston Respublikasi IIV huzuridagi 11-son jazoni ijro etish koloniyasida “Adolat” SDP Navoiy viloyat Kengashi tomonidan “Konstitutsiyaviy islohotlar davr talabi” mavzusida seminar tashkil etildi.

Uchrashuvda “Adolat” SDP Navoiy viloyat Kengashi raisi, xalq deputatlari viloyat Kengashi deputati R.Xayitov tomonidan yigʻilganlarga yangi tahrirdagi Konstitutsiya loyihasining mazmun-mohiyati haqida batafsil maʼlumot berdi.

Yangi tahrirdagi bosh qomusimiz inson-jamiyat-davlat tamoyili asosida isloh etilganligi, unda asosiy eʼtibor inson manfaatlariga eʼtibor qaratilganligini taʼkidladi. Xususan, turli bahsli holatlarda davlatdan koʻra, inson manfaatlari birinchi oʻringa qoʻyilgan. Bu esa oʻz navbatida demokratik davlatchilikning eng muhim shartlaridan biridir.

Inson huquqlarini himoya qilishda konstitutsiyadagi muhim oʻzgarishlardan yana biri advokatura institutiga bagʻishlangan va advokatlar faoliyatining kafolatlarini mustahkamlovchi alohida bob kiritilmoqda. Bu esa advokat, uning shaʼni, qadr-qimmati va kasbiy faoliyati davlat himoyasi boʻlishi va qonun bilan muhofaza qilinishi kafolatlanmoqda.

Umuman olganda tadbir ishtirokchilari tomonidan taʼkidlanganidek, konstitutsiyaviy islohotlar qanchalik mukammal boʻlmasin fuqarolarning huquqiy ongi va madaniyati yuksak darajada shakllanmasa demokratik huquqiy davlat faqatgina qogʻozlarda qolib ketishi mumkin.

Shu boisdan ham mamlakatimizda joriy yilning 30-aprelida boʻlib oʻtadigan referendumda har bir fuqaroning faol ishtirok etishi demokratik jamiyat qurishdagi muhim omillardan ekanligi urgʻulandi.

Targʻibot tadbirlari davom etmoqda.

“Adolat” SDP Navoiy viloyat
Kengashi matbuot xizmati