Jizzax viloyati ulkan oʻzgarishlar arafasida

Soʻnggi yillarda mamlakatimizda barcha sohalarda izchil islohotlar amalga oshirilib, hududlarni kompleks iqtisodiy rivojlantirish orqali aholi bandligi va daromadini oshirishni taʼminlash hamda turmush farovonligini yuksaltirish masalasiga strategik yoʻnalish sifatida eʼtibor qaratilib kelinmoqda.

Shu maqsadda davlatimiz rahbari Shavkat Mirziyoyevning ijtimoiy-iqtisodiy islohotlarning borishi, xalqimizning hayot darajasi va sifatini yanada oshirishga qaratilgan bunyodkorlik va obodonlashtirish ishlari bilan yaqindan tanishish, xalq bilan uchrashish va muloqot qilish maqsadidagi Jizzax viloyatiga tashrifi davomida hudud iqtisodiyotidagi oʻsish nuqtalarini belgilash va shu orqali ijtimoiy-iqtisodiy taraqqiyotni taʼminlashga alohida eʼtibor qaratilmoqda.

Oʻtgan qisqa vaqt ichida olib borilgan keng qamrovli ishlar barcha hududlar singari Jizzax viloyatining ham naqadar katta salohiyat va imkoniyatga ega ekanligini yaqqol namoyon etib bormoqda. Birin-ketin boʻy koʻtarayotgan yangidan-yangi turar joylar, taʼlim-tarbiya maskanlari, zamonaviy korxonalar, namoyon boʻlayotgan oʻziga xos infratuzilma albatta ezgu maqsad yoʻlidagi fidoiylik mevasidir.

Paxtakor tumanidagi “Paxtakor elita urugʻchiligi” fermer xoʻjaligi hududidagi har bir qarich yerdan unumli foydalanish maqsadida dala chetiga tut, uzum, poliz va dukkakli mahsulotlar ekilgan, kichik tovuqxona qurilgan, asalari uyalari qoʻyilgan. Yengil konstruksiyalardan dala uyi qurilgan, uning tomida quyosh panellar oʻrnatilgan. Bu esa fermer va ishchilarga bir qator qulayliklar tugʻdiradi, ularni arzon sifatli qishloq xoʻjalik mahsulotlari, tovuq goʻshti, tuxum, asal bilan taʼminlash imkonini beradi. Isteʼmoldan tashqari bozorga ham mahsulot chiqarish va qoʻshimcha daromad olish mumkin.

Prezidentimiz Jizzax viloyatiga bu galgi tashrifini mana shu fermer xoʻjaligidan boshladi. Xoʻjalik maydoni 100 gektar boʻlib, shundan 80 gektarida paxta va gʻalla, qolgan qismida soya, sarimsoqpiyoz, beda ekilgan. Davlatimiz rahbari bu yerdagi imkoniyat va sharoitlar bilan yaqindan tanishdi. Uchrashuv davomida davlatimiz rahbarining fermerlar, qishloq xoʻjaligi sohasi mutasaddilari va paxta-toʻqimachilik klasterlari rahbarlari bilan qilgan muloqoti chogʻida hosildorlikni oshirish, qishloq xoʻjaligini sanoatlashtirish, yangi korxonalar ochish va kasanachilik orqali aholi bandligini taʼminlash boʻyicha koʻrsatmalar berildi.

Tashrif davomidagi keyingi manzil “Jizzax” erkin iqtisodiy zonasi boʻldi. Davlatimiz rahbari bu yerdagi korxonalar faoliyati bilan tanishdi. “Jizzax” erkin iqtisodiy zonasida 27 ta loyiha amalga oshirilib, 5 ming 300 ga yaqin ish oʻrni yaratilgan. Oxirgi yillarda uning faoliyati takomillashtirilib, biznesga qulaylik kengaytirildi. Hozirgi kunda mazkur hududda koʻp turdagi sanoat mahsulotlari ishlab chiqarilmoqda. Qolaversa bu yerda yana 14 loyiha amalga oshirilmoqda. Shundan
5 tasi joriy yilda ishga tushiriladi. Prezidentimiz korxonalar faoliyati bilan tanishar ekan, ushbu korxonalar uchun zarur infratuzilma yaratish, tadbirkorlarga har tomonlama koʻmak berish, mahalliylashtirish darajasini oshirib, import oʻrnini bosuvchi va eksportbop mahsulotlar ishlab chiqarish boʻyicha koʻrsatmalar berdi. Qolaversa, ishlab chiqarish koʻlamini yanada oshirish uchun izlanish, imkoniyatlarni chuqurroq oʻrganish, xorijlik hamkorlar bilan til topisha bilish, ularning yurtimizga qiziqishini yanada oshirish lozimligi taʼkidlandi.

Tashrif soʻngida Prezidentimiz Shavkat Mirziyoyev sanoatni rivojlantirish va qayta tiklanuvchi energiya manbalarini koʻpaytirish masalalari boʻyicha yigʻilish oʻtkazdi. Mazkur yigʻilishda viloyatda yangi sanoat korxonalari barpo qilish uchun soʻnggi olti yilda qariyb 5 milliard dollar investitsiya jalb qilingani, buning natijasida 2 mingga yaqin yangi korxonalar tashkil qilinib, ishlab chiqarish hajmi qariyb 2 baravarga oshgani aytib oʻtildi.

Yigʻilishda energetika taʼminotini yaxshilash masalasiga ham eʼtibor qaratildi. Jizzax viloyatida kamida 2 ming Megavatt qayta tiklanuvchi energiya manbalari uchun salohiyat borligi qayd etildi. Bundan foydalanib, 270 Megavatt quyosh energiyasi quvvatlari ishga tushirilishi aytildi. Buning hisobiga 236 million kilovatt soat ishlab chiqarilib, tanqislik ortigʻi bilan qoplanadi, jami 71 million kub metr gaz tejaladi.

Jumladan, Gʻallaorolda Birlashgan Arab Amirliklarining “Masdar” kompaniyasining 200 million dollar toʻgʻridan-toʻgʻri investitsiyasi hisobidan, 220 Megavattni yirik quyosh stansiyasi ishga tushiriladi. Kelgusi yilda bu stansiya toʻliq quvvatga chiqib, 500 million kilovatt soat elektr olinadi va viloyat ehtiyojining 20 foizini qoplaydi.

Yigʻilish davomida Prezidentimiz viloyat jamoatchiligi vakillari, nuroniylar va yoshlar bilan muloqot oʻtkazib, ularning yurtimizdagi yangilanishlar, yaratilayotgan sharoitlar samarasi haqida oʻz hayoti va faoliyatidagi muvaffaqiyatlarini tingladi. Davlatimiz rahbari ularning taklif va tashabbuslarini tinglab, mutasaddilarga tegishli topshiriqlar berdi.

Amalga oshirilayotgan barcha kuch va saʼy-harakatlar odamlarning hayotdan rozi boʻlib yashashi, munosib sharoitlarda umrguzaronlik qilib, mehnat qilishlariga yoʻnaltirilayotgani amalda qanday samara berayotgani mamlakatimizdagi bugungi qizgʻin jarayonlarda oʻz ifodasini topmoqda.

Umuman olganda, Jizzax muhim oʻzgarishlar boʻsagʻasida turibdi. Prezident aytgan vazifalarning yaqin yillar ichida amalga koʻchishi shu yerda yashayotgan har bir inson hayotida katta oʻzgarishlar yasaydi.

Jasur QARSHIEV,

“Adolat” SDP Jizzax viloyat Kengashi rais oʻrinbosari.