Kambag‘al oila a’zosi daromad solig‘idan ozod qilinadi

Mamlakatimizda keyingi yillarda fuqarolarning ijtimoiy himoyasini kuchaytirish va kambag‘allikni qisqartirish davlat siyosatining ustuvor yo‘nalishlaridan biriga aylandi. Aholini yangi ish o‘rinlari va kafolatli daromad manbai, munosib yashash sharoitlari bilan ta’minlash sifat jihatidan yangi bosqichga ko‘tarildi.

Hududlar o‘rtasidagi iqtisodiy tengsizlikni qisqartirish, barcha tuman va shaharlarni bir maromda rivojlantirish bo‘yicha yangicha yondoshuvlar joriy etilgan holda, tuman va shaharlar mavjud sharoiti, salohiyati va imkoniyatlaridan kelib chiqib, 5 ta toifaga ajratildi.

Hozirgi kunda ushbu toifalarga qarab, tumanlarning iqtisodiy rivojlanishi belgilanmoqda. Tadbirkorlar uchun subsidiya, kreditlar va kompensatsiyalar toifalardan kelib chiqib ajratilyapti. Bu boradagi sa’y-harakatlar natijasida oxirgi uch yilda kambag‘allikni qisqartirish bo‘yicha alohida tizim joriy qilindi. 5 ta toifaga ajratilgan tumanlarning har biriga sharoitiga qarab yengilliklar berildi.

Shuningdek, har yili oilaviy tadbirkorlikka 13 trillion so‘m kredit va 1,5 trillion so‘m subsidiyalar ajratilyapti. Natijada o‘tgan yili 1 million nafar, 2023 yilning birinchi choragida 210 ming aholini kambag‘allikdan chiqarishga erishildi.

Prezidentimiz raisligida kambag‘allikni qisqartirish va bandlikni ta’minlash ishlarini yangi pog‘onaga olib chiqish chora-tadbirlari yuzasidan o‘tkazilgan videoselektor yig‘ilishida bu masalaga alohida e’tibor qaratilib, aniq taklif va muhim tashabbuslar ilgari surildi.

Kambag‘allikni faqat pul berish yo‘li bilan qisqartirib bo‘lmasligi hammamizga yaxshi ma’lum. Buning uchun joylarda tadbirkorlar bilan manfaatli hamkorlik qilib, ularni qo‘llab-quvvatlash kerak.

Aholi bandligini ta’minlash va malakali mutaxassislar tayyorlash samaradorligini oshirish maqsadida tadbirkorlikka yanada keng imkoniyatlar yaratish va moliyaviy rag‘batlar taqdim etish bo‘yicha ilgari surilgan tashabbuslar ayni muddao bo‘ldi.

Xususan, joriy yil 1 iyundan boshlab “20 ming tadbirkor – 500 ming malakali mutaxassis” dasturi amalga oshiriladi. Dastur doirasida esa 2023-2024 yillarda jami 1 milliard dollar ajratiladi. Ushbu mablag‘lar hisobidan kambag‘al oilalar a’zosini kasbga o‘qitib, ishli qilish bo‘yicha loyiha ahamiyatiga qarab, amaldagidan past foizlarda va uzoqroq muddatga kredit beriladi.

Bular hali hammasi emas. Bundan tashqari, dasturda ishtirok etadigan tadbirkorlarga soliqlardan alohida imtiyozlar beriladi. Jumladan, kamida 20 foiz kambag‘al oila a’zosini bir yil davomida ish bilan ta’minlasa, mol-mulk va yer soliqlaridan ozod qilinadi. Kambag‘al oila a’zosi daromad solig‘idan ozod qilinsa, 5 million so‘mgacha ish haqi to‘layotgan tadbirkorlarga ijtimoiy soliq stavkasi 2 baravarga kamaytiriladi.

Dasturda ishtirok etayotgan tadbirkorlarga bojxona rasmiylashtiruvi paytida “yashil yo‘lak” tartibi qo‘llanilishi, dasturga kirgan tadbirkorlarga esa infratuzilma, yer va bino-inshootlar bilan ta’minlashda qo‘shimcha yengilliklar berilishi e’tiborga molik.

Kambag‘allikni qisqartirish sohasida Xitoy tajribasini o‘rganishga alohida e’tibor qaratilgani ham bejiz emas. Chunki shu maqsadda Xitoy davlati bilan yurtimiz ishbilarmonlari o‘rtasida amaliy uchrashuvlar o‘tkazilib, kelishuvlar natijasida qator shartnomalar imzolangan. Tajribali ekspertlarning o‘zaro almashinuvi asosida 18 ta yo‘nalishda manzilli loyihalar tayyorlangan.

Mazkur loyihalar doirasida esa Xitoy tajribasi asosida har bir viloyatda kambag‘allikdan chiqarish bo‘yicha alohida dastur amalga oshiriladi. Bunda kambag‘allik yuqori bo‘lgan tumanlarda yo‘l-transport, elektr, aloqa va turizm infratuzilmasini yaxshilash, kichik va o‘rta shaharlarni rivojlantirish, mahallalarni sanoatlashtirishga alohida e’tibor qaratiladi.

Umuman olganda, bugun mamlakatimizda amalga oshirilayotgan izchil islohotlar inson huquq va erkinliklarini ta’minlash, odamlarni rozi qilish, xalqimizni farovon turmush kechirishi uchun zarur sharoitlar yaratishga qaratilgan. Prezidentimiz ta’biri bilan aytganda, “Barcha orzu-niyatlarimiz, intilishimiz, ezgu amallarimiz, mashaqqatli mehnatimiz, kechani-kecha, kunduzni-kunduz demasdan amalga oshirayotgan sa’y-harakatlarimiz — hamma-hammasi bizga katta umid bilan boqib turgan xalqimiz uchundir”.

GULRUX AGZAMOVA,

Oliy Majlis Qonunchilik palatasi deputati,

"Adolat" SDP fraksiyasi a'zosi