“Keksalari eʼzozlangan yurt”

Azal-azaldan yurtimizda keksalar eʼzozda boʻlib, ularga alohida hurmat va ehtirom koʻrsatib kelinadi. Bu yoshlar zimmasidagi masʼuliyat va farzga aylangan desak, mubolagʻa boʻlmaydi. Oʻzbekiston “Adolat” SDP Qorakoʻl tuman Kengashi deputati R.Shukrullayevaning tashabbusi bilan Qorakoʻl tumanida istiqomat qiluvchi bir guruh nuroniylar Toshkent shahrida joylashgan “Gʻalaba” bogʻini sayohat qilishdi. Muzey qariyalarda katta taassurot qoldirdi, ular urush davridagi barcha eksponatlar bilan tanishishdi.

Nuroniylar “Shon — sharaf” muzeyidagi ham tashrif buyurishdi. Muzeyga kirar ekansiz, dastlab frontga otlangan askarni kuzatayotgan yaqinlari tasvirlangan suratga koʻzingiz tushadi. Rassom asarni shunday mahorat bilan ishlaganki, goʻdaklar qarogʻida toʻlib turgan yosh, farzandiga oq yoʻl tilayotgan mushtipar onaning yuzidagi gʻam yaqqol koʻrinadi. Sayohat davomida keksalarimiz eksponatlarni tomosha qilar ekan, chuqur oʻyga tolib, bugungi nurafshon kunlarimizga shukrona keltirishimizni koʻp bora taʼkidladilar.

Xulosa oʻrnida shuni aytish mumkinki, keksalarimizning duoga ochgan qoʻllari, yuzlaridagi mamnunlik ifodasini koʻrib, ularni qancha koʻp qadrlab eʼzozlasak, hurmat va ehtirom koʻrsatsak ham shu qadar kam ekanligini yana bir karra his etasan kishi.

Zero, bugungi farovon hayot va shodmon kunlarga yetishimizda ularning beminnat hissasi bor, mehnati singgan. Shunday ekan, keksa avlod vakillarining duosini olib yurish barchamizga nasib aylasin.

Mohigul Rahimqulova,

“Adolat “ SDP Buxoro viloyat Kengashi Matbuot kotibi.