Kichik mehnatim Yangi O‘zbekistonning kichik bir tamal toshi bo‘la olsa, baxtiyorman

Mamlakatimiz mustaqilligining 32 yilligi oldidan turli soha vakillari, davlat xizmatchilari faxriy unvonlar, orden va medallar, qator davlat mukofotlari bilan taqdirlandi.

Jumladan, “O‘zbekiston Respublikasi mustaqilligining o‘ttiz ikki yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhini mukofotlash to‘g‘risida”gi Prezident farmoni bilan O‘zbekiston Respublikasi Oliy Majlisi Qonunchilik palatasining Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi a’zosi Gulruh Agzamova «Do‘stlik» ordeni bilan taqdirlandi. Xalq vakili ushbu yuksak e’tirof hayajonlarini izhor qildi:  

— Bu kabi yuksak davlat mukofotlari har bir inson hayotida katta ahmiyatga ega bo‘ladi. Chunki har bir insonni o‘z mehnati davomida shunday mukofotlarga loyiqmizmi, noloyiqmizmi, degan savollar qiynab keladi. Mehnat qilgan kishi o‘z mehnatining e’tirofini kutadi. Men uchun bu mukofotning ham kutilgan, ham kutilmagan jihatlari bisyor. Kutilgani shundan iboratki, bugungi kunda yurtimizda olib borilayotgan islohotlar, aholiga yaratilayotgan sharoitlar, ayniqsa, ayollarimizga bo‘lgan e’tiborning bir ulushi bo‘lsa kerak. Mehnat jarayonida inson o‘ziga o‘zi baho bera olmaydi. Biz xalq vakillari har bir ishimizning natijasi o‘laroq, bizga ishongan aholi, saylovchilar hayotidagi, okruglarimizdagi o‘zgarishlarni aytish mumkin.  

Albatta, bu orden zimmamga katta mas’uliyat, javobgarlik yuklaydi. Bu har bir mehnatimizga bo‘lgan e’tibor, davlat rahbarining e’tiboridir. Mening mehnatim Yangi O‘zbekistonning kichik bir tamal toshi bo‘la olsa, eng asosiysi, millatning kelajagiga hissa qo‘sha olsam, bu mukofotni katta bir baxt, katta ulush, yangi O‘zbekistonning yangilanishi, ertangi kunga bo‘lgan ishonch deb bilaman. Qolaversa, o‘zbek ayoliga bo‘lgan e’tiborning unvoni va timsoli deb bilaman.    

O‘zA muxbiri Muhtarama Komilova yozib oldi.