Kitob - beminnat ustoz

Oʻzbekiston “Adolat” SDP Qashqadaryo viloyat Kengashi tomonidan Qarshi muhandislik iqtisodiyot instituti tadbirgohida partiyaning “Vatan kelajagi yoshlar qoʻlida” loyihasi doirasida “Kitob tafakkurni yuksaltiradi” mavzusida maʼnaviy- maʼrifiy tadbir boʻlib oʻtdi. Oliygoh talabalari, yoshlar tashkilotlari vakillari, “Yosh adolatchilar qanoti” yetakchilari ishtirok etgan tadbirda unib oʻsib kelayotgan yosh avlodga vatanparvarlik va umuminsoniy gʻoyalarni kitob bilan, soʻz bilan singdirish ijobiy samara berishi alohida eʼtirof etildi.

— Bugun yoshlarimiz kitob oʻqishni odat qilishlari kerak,-dedi QMII professori, partiya faoli Xayrulla Davlanov. — Albatta, buning uchun kitobxonlikni oiladan boshlash kerak. Ota-onalarimiz oʻz farzandining ruhan sogʻlom boʻlib voyaga yetishi, oʻqishi, hunar oʻrganishi, sport bilan muntazam shugʻullanishi, ilm olishi uchun doimiy harakatda boʻlib, gʻamxoʻrlik koʻrsatishlari kerak.

— Men “Adolat” SDP ning kitob targʻiboti borasidagi faoliyatini juda qadrlayman, — deydi “Yosh adolatchilar qanoti” yetakchisi, QMII 4-bosqich talabasi Madina Allaberdiyeva. — Oʻtgan yili partiya tomonidan Oliy taʼlim muassasalari talabalari oʻrtasida oʻtkazilgan “Kitob bilim manbai” koʻrik tanlovida ham faol ishtirok etdim. Haqiqatdan ham kitobning inson hayotidagi oʻrni beqiyos.

— Men koʻp yillar davomida maʼrifat, maʼnaviyat sohalarida ishladim, — deydi Oʻzbekiston Qahramoni, Xalq deputatlari Qashqadaryo viloyat Kengashi deputati Muhabbat Sharopova. — Muhtaram Prezidentimiz ham kimki oʻz hayotini yaxshi tomonga oʻzgartirmoqchi ekan,  koʻproq kitob mutolaa qilishi lozimligini tez-tez aytadilar. Darhaqiqat, kitob insonning butun hayoti mazmuniga jiddiy taʼsir koʻrsatadi. Yoshmi yoki katta kishimi har kuni kitob mutolaa qilsa, qimmatli maʼlumotlarga ega boʻladi. Fikrlash layoqati kengayadi, bilmaganlarini oʻrganadi. Shuning uchun ham aziz yoshlar buning uchun albatta, vaqt ajrating, oʻzingizni intizomga oʻrgating. Bilimsizlik rivojlanmaslikka, oʻzining mustaqil fikriga ega boʻla olmaslikka, mol-dunyoga hirs qoʻyishga, maʼnaviy qashshoqlikka va birovlarga tobe boʻlishga olib keladi.

Tadbir nihoyasida oʻqish va jamoat ishlarida faol ishtirok etayotgan bir guruh talabalarga partiya homiylari tomonidan kitoblar sovgʻa qilindi. Shuningdek yoshlar oʻrtasida kitobni eng koʻp targʻib etgan maʼnaviyatchilar ham ragʻbatlantirildi.

Sarvinoz Karimova,
“Adolat” SDP Qarshi shahar Kengashi
“Yosh adolatchilar qanoti” yetakchisi.