Konstitutsion oʻzgarishlar boʻlajak filologlar nigohida

“Adolat” SDP Urganch shahar Kengashi tomonidan Urganch davlat universitetining “Filologiya” fakultetida “Konstitutsiya yoshlar nigohida” mavzusida maʼnaviy-maʼrifiy tadbir tashkil etildi. Tadbirga partiya faollari, deputatlari hamda oʻqituvchi va talabalar ishtirok etishdi.

Tadbirni partiyaning Urganch shahar Kengashi raisi, deputatlik guruhi rahbari Rustam Boltayev kirish soʻzi bilan ochib berdi.

Taʼkidlanganidek, mamlakatimizda tarixiy voqealikka ega boʻlgan Oʻzbekiston Respublikasi Konstitutsiyasiga oʻzgartirish va qoʻshimchalar kiritish umumxalq muhokamasiga qoʻyilgani, yangi tahrirdagi Konstitutsiya 65 foizga yangilanib, 128 moddadan 155 moddaga koʻpaygani, har bir kiritilgan oʻzgartirish va qoʻshimchalar fuqarolarning yashash sharoitini yanada yaxshilash va ularning turmushidan rozi boʻlib yashashlari uchun xizmat qilishi hamda boshqa oʻzgarish va qoʻshimchalar yuzasidan atroflicha maʼlumotlar berildi.

Shuningdek, yoshlarning qonuniy manfaatlarini himoya qilish maqsadida yangilangan Konstitutsiyada “Yoshlar” deb nomlangan yangi bobning oʻrin olishi, yoshlarga yanada kengroq imkoniyatlar yaratilishi, bir soʻz bilan aytganda, yoshlar uchun alohida bobning kiritilishi yoshlarni Oʻzbekistonning eng katta bebaho boyligi, yangi Oʻzbekistonimizni barpo etishda maʼrifatparvar, kuchli bilim va keng dunyoqarashi kelajak avlodning oʻrni alohida ekanini ifoda etgani xususidagi fikr va mulohazalar yoshlarning diqqat markazidan joy oldi va ularning Konstitutsiyaga boʻlgan qiziqishlarini hamda bilimlarini yanada oshirdi va Referendumda faol ishtirok etishga chorladi.

Fikr va mulohazalar, taklif va tavsiyalar qizgʻin tus olgan tadbir soʻngida talabalar qiziqqan savollariga partiya faollaridan atroflicha javoblar olishdi.

Vohada bu kabi tadbirlar davom etmoqda.

Zamira Abdullaeva,

“Adolat” SDP Xorazm viloyat Kengashi matbuot kotibi.