Konstitutsiya yorqin kelajagimiz kafolati

O‘zbekiston “Adolat” SDP viloyat va Qarshi shahar Kengashi tomonidan Qarshi shahridagi “Qatag‘on qurbonlari” muzeyi tadbirgohida “Konstitutsiya yorqin kelajagimiz kafolati” mavzuida tadbir bo‘lib o‘tdi. Unda partiya faollari, nuroniylar, yoshlar hamda ommaviy axborot vositalari vakillari qatnashdi. Tadbirda partiya viloyat Kengashi raisi, xalq deputatlari viloyat Kengashi deputati Ruiddin Raupov ma’ruza qildi.

-Prezidentimizning “Yangi tahrirdagi O‘zbekiston Respublikasi Konstitutsiyasini amalga oshirish bo‘yicha birinchi navbatdagi chora-tadbirlar to‘g‘risida”gi farmoniga asosan partiya tashkilotlarimiz tomonidan joylarda keng qamrovli targ‘ibot-tashviqot ishlari olib borilayapti,-dedi Ruiddin Raupov

-  Bosh qomusimizga kiritilgan o‘zgartishlarning mazmun-mohiyati, ta’lim rivojiga doir muhim jihatlar xususida batafsil ma’lumotlar berilmoqda.  Asosiy Qonunimiz mamlakatimizda yangi hayot, yangi jamiyat barpo etish yo‘lida qo‘lga kiritilayotgan barcha yutuq va marralarimizning xuquqiy poydevori – kelajagimizning ishonchli kafolati ekanligi  tushuntirilayapti.

Tadbirda   so‘zga chiqqan xalq deputatlari Qarshi shahar Kengashi deputati Chamangul Muhammadiyeva, huquqshunos Abduraxmat Kengboyev va boshqalar ham yangi konstitutsiyaviy qonunning  50 va 52-moddalarida maktab  va maktabgacha ta’limni rivojlantirish bo‘yicha qator huquqiy asoslar keltirib o‘tilgani, yoshlar masalasi hamisha davlat e’tiborida ekanligi, shuningdek qariyalar va nogironlar ijtimoiy  muhofazada bo‘lishini   qayd etishdi.

— Men 27 yildan buyon pedagogika sohasida xizmat qilib kelaman,-dedi Nargiza Hamroyeva.-Shunday davrlar bo‘ldiki  , o‘qituvchi obro‘si yer bilan bitta bo‘lgan paytlarni ko‘rdim. O‘qituvchiga yuqori tashkilotlar, hokimiyatdagi mas’ullar,  hatto ularning eng kichik xodimlari ham turli yo‘nalishlarda nohaq  buyruq berib, do‘q urib, qaddini bukkanining guvohi bo‘ldim. O‘sha yillarda qadr topmagan o‘qituvchi endi o‘tmishda qoldi. Asosiy qonunga kiritilgan o‘zgartirishlar ularning konstitutsion huquqlari, manfaatlari maqomini mustahkamlaydi. Yangi Konstitutsiyamizning 52-moddasida bu o‘z aksini yaqqol topdi. Bundan men kabi yuzlab o‘qituvchilarning qalblari faxr iftixorga to‘ldi. 

- Konstitutsiyamizda voyaga yetmagan  bolalar mehnati taqiqlanib, avvalgi yillardagidek paxta terimi, ko‘cha  tozalash,  supur-sidir ishlari bilan o‘quvchi va o‘qituvchilarni majburiy shug‘ullantirish mutlaqo taqiqlandi, – dedi tadbir ishtirokchisi, muzey direktori Dilnavoz Rahmatova - Yangi  Konstitutsiyamizning 44-moddasida majburiy mehnat, bolalarning barkamol rivojlanishiga salbiy ta’sir qiladigan har qanday bolalar mehnati taqiqlanishi belgilab qo‘yildi. Ushbu muhim o‘zgarish aynan majburiy mehnat, xususan, bolalar majburiy mehnatiga to‘liq barham berdi.

        Tadbir davomida  huquqiy o‘zgarishlar xususida ishtirokchilarga batafsil ma’lumotlar berildi. Yoshlar o‘zlarini qiziqtirgan savollarga mutassaddilardan kerakli javoblarni oldilar.

      Akmal Xaitov,

“Adolat” SDP Qarshi shahar Kengashi raisi.