Konstitutsiyada kafolatlangan tibbiy xizmat

Bugun barchamiz muhim siyosiy jarayon-shu yilning 30-aprelʼ kuni oʻtkaziladigan referendum oldida turibmiz. Bu kun Oʻzbekistonning, xalqimizning ertangi kunini belgilab beradi.

Aytish mumkinki, umumxalq muhokamasida oʻz tasdigʻini topgan va ayni kunlarda qoʻllab-quvvatlanayotgan Bosh Qomusimizni yanada takomillashtirish, inson qadrini ulugʻlashdek ezgu niyatni unda mustahkamlab qoʻyish maqsadida Oʻzbekiston Respublikasi Konstitutsiyasiga taklif berish va uni hayotimiz talablaridan kelib chiqqan holda yanada takomillashtirish masalasi ilgari surildi. Qonun loyihasining har bir moddasi xalqchil tarzda xalqimiz bilan maslahatlashgan holda tayyorlandi.

Oliy Majlis Qonunchilik palatasi deputati Mavluda Adhamjonova ishtirokida Andijon viloyat qon quyish markazida oʻtkazilgan tadbirda yuqoridagilar haqida soʻz bordi.

Taʼkidlanganidek, Konstitutsiyaviy islohotlar keng qamrovli boʻlib, ulardan eng eʼtiborlisi sifatli va malakali tibbiy xizmatni tashkil etish masalasini konstitutsiyaviy darajada mustahkamlab qoʻyish bilan bogʻliq. Bugungi kunda tibbiy xizmatlarning sifat darajasi oshib, yangi zamonaviy yoʻnalishlar, davolash va diagnostika usullari, noyob ilmiy-amaliy tajribalar shakllanmoqda. Jamiyatda yashovchi har bir shaxsning malakali tibbiy xizmatdan foydalanishi uning Vatanga boʻlgan ertangi ishonchini yanada oshiradi. Shunga koʻra, Konstitutsiyamizda mamlakatda inson huquqlari va qonuniy manfaatlarini taʼminlash, qadr-qimmatini ulugʻlashda sogʻliqni saqlash tizimi ustuvor ahamiyat kasb etishi qayd etilgan. Yangi tahrirdagi Konstitutsiyada qayd etilishicha, Oʻzbekiston Respublikasi fuqarolari tibbiy yordamning kafolatlangan hajmini qonunda belgilangan tartibda davlat hisobidan olishga haqli.

Mavluda Adhamjonova, Oliy Majlis Qonunchilik palatasi deputati:

-Fuqarolarga tibbiy yordamning kafolatlangan hajmini qonunda belgilangan tartibda va davlat hisobidan koʻrsatilishi aholi salomatligi uchun muhim ijtimoiy koʻmak hisoblanadi. Davlat hisobidan kafolatlangan tibbiy xizmatni rivojlantirish maqsadida ixtisoslashgan tibbiyot markazlarining yuzdan ortiq filiallari faoliyat boshladi. Bularning barchasi yurtimizda istiqomat qilayotgan fuqarolarning sogʻligʻini saqlashga qaratilgan amaliy choralardir. Konstitutsiyaga kiritilayotgan normaning yana bir ahamiyati shundaki, davlat oʻz fuqarolarining moddiy ahvolidan qatʼi nazar kafolatlangan bepul tibbiy yordam bilan qamrab olinishini mustahkamlamoqda. Bu fuqarolar, ayniqsa, moddiy sharoiti yaxshi boʻlmaganlarning sogʻligʻini saqlashga davlat gʻamxoʻrlik qilishdan toʻxtamasligini anglatadi.

“Adolat” SDP Andijon viloyat kengashi

Matbuot xizmati.