Konstitutsiyaviy islohotlar yangi marralar sari chorladi

Dunyo oʻzgarmoqda, globallashuv jarayonida Oʻzbekistonimiz xalqimizning farovon hayotini hamda dunyo hamjamiyatida oʻz maqomi, oʻz maqsadi va oʻz oʻrnini yanada mustahkamlash uchun bugun Konstitutsiyaviy islohotlar zarurligini va amalga oshirishni oʻz oldiga maqsad qilib qoʻydi. Bugun konstitutsiyaviy islohotlar, yaʼni Konstitutsiyamizga oʻzgartirishlar va qoʻshimchalar kiritish xalqimizning xohishirodasi, manfaatlaridan kelib chiqib amalga oshirilayotgani, ayniqsa, bu jarayonda oila, xotin-qizlar, yoshlar, bolalar manfaatlarini koʻzlab bir necha moddalarning takomillashayotgani, muhim yangi moddalar kiritilayotganidan Oʻzbekiston insonlari qadrlangan yurt ekanini aks etmoqda. Shu bois, bu siyosiy jarayon xalqimiz tomonidan iliq kutib olinmoqda. Yangilanayotgan Konstitutsiyamiz barcha yurtdoshlarimizga bayramona kayfiyat ulashmoqda.

Men baxtli ona, baxtli ayol sifatida Bosh Qomusimizga kiritilayotgan oilalar, ayollar, yoshlar va bolalar manfaatlariga oid muhim boʻlgan har bir moddani zoʻr qiziqish va ishtiyoq bilan oʻqirkanman, insonlari qadri mustahkamlanib borayotgan jonajon Oʻzbekistonda tugʻilib, yashab, yurtimga xolisona xizmat qilayotganimdan faxrlanaman. Yoniq yuragim bilan mana shu siyosiy va ijtimoiy jarayonlarda hamda joriy yilning 30-aprel kuni boʻlib oʻtadigan referendumda faol ishtirok etib yangi tahrirdagi Konstitutsiyamizni bir ovozdan qoʻllab-quvvatlashda oilam hamda jamoam bilan hamjihatlikda munosib hissa qoʻshaman va Yangi Oʻzbekistonimizni barpo etishda bor kuch va gʻayratimni ayamayman.

Chunki, yangilanayotgan Konstitutsiyamizga kiritilgan barcha qoʻshimcha moddalar bilan tanishar ekanman, Bosh Qomusimiz farovon hayotimiz kafolati ekaniga amin boʻldim.

Saodat Masharipova,
“Adolat” SDP Bogʻot tumani
Kengashi “Ayollar qanoti” raisi.