Korrupsiya illatiga barham beraylik

Oʻzbekiston “Adolat” SDP Mirishkor tuman Kengashi, tuman oila va xotin-qizlar boʻlimi bilan hamkorlikda tuman xalq taʼlimi boʻlimida “Taʼlimda korrupsiyaga yoʻl bermaymiz!” mavzusida uchrashuv tashkil etildi. Taʼlim muassasalari pedagoglari, yoshlar, xotin-qizlar vakillari ishtirok etgan tadbirda taʼlimda korrupsiyaga yoʻl bermaslik, bu bilan kelajak avlodni sogʻlom muhitda kamolga yetkazish, jinoyatni oldini olish, jamoatchilik orasida targʻibot ishlarini kuchaytirish, taʼlim muassasalari va joylarda targʻibot ishlarini amalga oshirish, Prezidentimizning 2022-yil 20-dekabrdagi Oliy Majlisga va Xalqimizga yoʻllagan Murojaatnomasida keltirib oʻtilgan taʼlim sohasiga oid vazifalarni oʻqituvchilarga keng tushuntirish xususida soʻz yuritildi.

— Yurtimizda muhtaram Prezidentimiz boshchiligida taʼlim tizimini tubdan isloh qilish, uning sifati hamda samaradorligini oshirish, taʼlim muassasalarining moddiy-texnika taʼminotini mustahkamlash borasida keng koʻlamli ishlar olib borilmoqda, — dedi xalq deputatlari Qashqadaryo viloyat Kengashi deputati Qoʻyli Narzullayev. — Shu bilan birga, oliy oʻquv yurtlariga qabul jarayonlari yangicha tizim asosida tashkil etilayotgani, taʼlimdagi korrupsiya va poraxoʻrlikning oldini olishda ahamiyatli boʻlmoqda.

— Darhaqiqat, sohadagi islohotlar sabab vaziyat tubdan oʻzgardi,- dedi xalq deputatlari Mirishkor tuman Kengashi deputati Sarvinoz Abdullayeva. — Endilikda taʼlimdagi korrupsiyani tag-tomiri bilan yoʻq qilish uchun keng koʻlamli ishlar olib borilyapti. Lekin korrupsiyaga qarshi kurash tobora qatʼiy boʻlib borsa-da, chirmovuq kabi uning ildizlari hali-hanuz saqlanib qolmoqda. Shuni achinish bilan aytish kerakki, pora berish tashabbusi aynan fuqarolarning oʻzidan chiqayotgani, afsuski, achchiq haqiqatdir. Shuni unutmasligimiz kerakki. Yangi Oʻzbekistonni halol va korrupsiyadan xoli hududga aylantirishga barchamiz birdek masʼulmiz. Poraxoʻr kimsalarga qarshi ayovsiz kurashishda fuqarolarimizning harakati asosiy kuchga ega boʻlishini anglab yetishimiz shart.

Tadbirda kun tartibidagi masala yuzasidan soʻzga chiqqan partiya faollari, taʼlim muassasalari oʻqituvchilari 2023- yilda barcha maktablarda sifatli taʼlimga erishish, tuman taʼlim tizimini korrupsiyadan xoli tashkilot sifatida eʼtirof etish uchun barcha chora-tadbirlarni koʻrish zarurligini qayd etdilar. Taʼlimda korrupsiyani yoʻq qilsak, xalqaro miqyosda yuqori reyting koʻrsatkichlarga erishishimiz muqarrarligi taʼkidlandi.

Toʻlqin Xidirov,
“Adolat” SDP Mirishkor tumani
Kengashi raisi.