Korrupsiyaga yo‘l bermaymiz

“Adolat” SDP jamiyatda qonun ustuvorligini ta’minlashda korrupsiyani oldini olish asosiy vazifalardan biri deb biladi. Ayni shu maqsadda bu jirkanch illatga qarshi tizimli ravishda kurash olib borilmoqda. Partiyaning Andijon tuman kengashi tashabbusi bilan Andijon qishloq xo‘jaligi va agrotexnologiyalar institutida tashkil etilgan davra suhbati ayni shu mavzuga bag‘ishlandi.

“Ta’limda korrupsiyaga yo‘l bermaymiz!” deya nomlangan mazkur tadbirda oliygoh o‘qituvchilari, huquqshunoslar, talabalar va OAV vakillari ishtirok etdi. Unda so‘z olganlar ta’kidlaganidek, korrupsiyaning oqibati bilan emas uning kelib chiqish sabablari bilan ham kurashish kerak. Bu borada jamoatchilik nazoratining o‘rni katta. Bir qarashda oddiydek ko‘ringan holat tomir otib jinoyatga aylanishi mumkin. Yoshlarning huquqiy madaniyatini oshirish barobarida jinoyatning bu turini oldini olishga chaqirish zarur.

Murodjon Qodirov, “Adolat” SDP Andijon tuman kengashi raisi:

-Ayni paytda mamlakatimizda korrupsiyaga qarshi kurashishning barcha huquqiy asoslari yaratilgan. Bu borada har birimizdan hushyorlik va mas’uliyat talab etiladi. Ayniqsa ko‘p sonli yoshlar jamlangan ta’lim muassasalarida targ‘ibot tadbirlarini kuchaytirish lozim. Toki yigit qizlar uning jamiyat rivojiga qanchalik salbiy ta’sir ko‘rsatishini tushunib yetsin. Bugungi tadbir oldiga ham shunday maqsad qo‘yildi.

Davra suhbati yakunida Yoshlar siyosati borasida amalga oshirilayotgan isloxotlar, oliygohlarda yaratilgan sharoitlar va talabalarni qo‘llab-quvvatlash bilan bog‘liq tadbirlar xaqida so‘z bordi. Bunga javoban har bir talaba faol bo‘lishga va jamiyat rivojiga munosib hissa qo‘shishga chaqirildi.

“Adolat” SDP Andijon viloyati kengashi

Matbuot xizmati.