Kuchli  ijtimoiy siyosat– xalq farovonligining kafolati

“Adolat” SDP Toshloq tumani Kengashi tomonidan “ Partiya patronaji” loyihasi doirasida tumandagi korxona va tashkilotlarda, taʼlim muassasalarida keng qamrovli targʻibot tadbirlari olib borilyapti. Partiyaning saylov oldi dasturida koʻrsatilgan ulugʻvor maqsadlarni barchaning ong-u shuuriga singdirish orqali partiya saflarini kengaytirish ezgu istaklarga aylangan.  

Biz “Ijtimoiy tenglik – teng huquq va teng masʼuliyat demakdir” degan tamoyilga tayangan holda jamiyatdagi ijtimoiy tenglikni taʼminlaydigan, har bir fuqaroning qobiliyati hamda malakasidan kelib chiqqan holda mehnat qilishi kafolatlanadigan, u oʻz mehnatining miqdori va sifatiga yarasha munosib ish haqi va hayot darajasiga erishishi uchun keng imkoniyatlar yaratilgan ijtimoiy davlat qurish uchun kurashamiz, — deydi tuman Kengashi raisi Farhod jon Alijonov partiyaning ezgu gʻoyalariga tayangan holda.

Haqiqatdan ham men partiyaning saylovoldi dasturi bilan yaqindan tanishman, -deydi samimiy uchrashuvda maktab oʻqituvchisi Mohirbek Toʻxtasinov. Bugun har bir inson ilmlilik – saodat ekanligini, ilmsizlik esa inson boshiga musibatlar yogʻdirishini chuqur anglab yetdi. Yaponiya granti asosida maktabimizda amalga oshirilayotgan hamkorlik ishlarini bilvosita guvohi va ishtirokchisimiz. Oʻqituvchi qadr- qimmati shu “Adolat” partiyasi tashabbusi bilan ulugʻlanayotganiga barchamiz shohidmiz. Prezidentimiz rahnamoligida taʼlim sifatiga, uni ijodkori boʻlgan oʻqituvchilarning qadr-qimmatini oshirishga doir koʻplab muhim hujjatlar qabul qilindi. Bir necha bor oylik maoshlarimiz oshirilishi esa barchamizni xursand qilmoqda. Shunday ekan, biz hamisha Adolat tarafdorimiz.

Shu kuni ustozlar bilan kechgan samimiy suhbat davomida hududdagi “Doʻstlik” mahalla fuqarolar yigʻinida pedagog xodimlardan iborat boshlangʻich partiya tashkiloti tuzilib, yangi jamoa shakllanishiga asos solindi. Uchrashuv davomida boshlangʻich partiya tashkilotining kelgusi maqsad va vazifalar belgilab olindi.

“Adolat” SDP

Fargʻona viloyat Kengashi Matbuot xizmati.