Kuchli va adolatli jamiyatga ijtimoiy birdamlik orqali erishamiz!

Oʻzbekiston Respublikasi Prezidentligiga “Adolat” SDPdan partiyamizdan koʻrsatilgan nomzod –Robaxon Maxmudovaning Buxoro viloyatidagi ishonchli vakili Masud Hamidov Romitan tumani 1-son ixtisoslashtirilgan davlat umumtaʼlim maktabi faollar zalida saylovchilar bilan uchrashuvi tashkil etildi.

Tadbirda Oliy Majlis Qonunchilik Palatasi deputati T.Choriev, mazkur maktabning pedagog xodimlari, partiya faollari va saylovda ilk bor ishtirok etayotgan yoshlar ishtirok etishdi.

Uchrashuvda soʻz olgan nomzodning ishonchli vakili Maqsud Hamidov partiyadan Oʻzbekiston Respublikasi Prezidentligiga koʻrsatilgan nomzod Robaxon Maxmudovaning tarjimai holi bilan yigʻilganlarni batafsil tanishtirdi. Shundan soʻng nomzodning Saylovoldi dasturida oʻrin olgan muhim yoʻnalishlar boʻyicha ilgari surilayotgan takliflar xususida batafsil toʻxtaldi.

Uchrashuv chogʻida ishonchli vakil nomzodning dasturida keltirilgan yoʻnalishlardan biri boʻlgan mamlakatimiz aholisini ijtimoiy himoya qilish va bu yoʻnalishda tadbirkorlik subyektlarini qoʻllab-quvvatlash boʻyicha “Ijtimoiy davlat – 2030” dasturini ishlab chiqish lozimligi, shuningdek tuman va shaharlarni bir maromda rivojlantirish, faoliyatda juda yaxshi natija bergan va fuqarolarga juda katta madad boʻlgan subsidiyalar berish tizimini takomillashtirish va maqsadli ishlatilishi ustidan jamoatchilik nazoratini kuchaytirib borish, agar maqsadsiz ishlatilsa, albatta, subsidiya davlatga qaytarilishi shartligiga toʻxtalib oʻtdi.

Bojxona va soliq imtiyozlarini takomillashtirish hamda imtiyozlarni aniq sohalarga yoʻnaltirish kerakligiga, bundan tashqari, Oʻzbekiston boʻyicha ishlab chiqarilayotgan har qanday turdagi mahsulotlarni sifatiga alohida eʼtibor qaratish darkorligiga, nomzod saylovoldi dasturida boshqa bir qator muhim masalalarga ham alohida eʼtibor qaratilganligini taʼkidladi.

Fikr va mulohazalarga boy boʻlgan uchrashuv soʻngida saylovchilar qiziqqan savollariga ishonchli vakil tomonidan batafsil javoblar olishdi.

Viloyatimizning barcha tumanlarida ishonchli vakilning uchrashuvlari davom etmoqda.

Mohigul Rahimqulova,

“Adolat” SDP Buxoro viloyat Kengashi matbuot kotibi.