Maʼrifatga intilish–yuksak maʼnaviyatga erishmoqqa poydevordir!

Mamlakatimizda “Jaholatga qarshi – maʼrifat” degan ezgu gʻoyasini ilgari surish va bu gʻoya asosida islom dinining insonparvarlik mohiyatini, tinchlik va doʻstlik kabi olijanob maqsadlarga xizmat qilishini targʻib etish kun tartibimizdagi doimiy masalalardan biri.

Respublika Maʼnaviyat va maʼrifat markazi Kogon shahar boʻlinmasi rahbari Qurbonov Umidjon, Diniy qoʻmitaning shahar vakili Sharopov Faxriddin, shahar targʻibot guruhi raisi Suvonova Gulsara va “Adolat” SDP Kogon shahar rais Maktuba Hamroyevalar bilan hamkorlikda Kogon shahar 5-IDUMda “Jaholatga qarshi maʼrifat” mavzusida targʻibot tadbiri boʻlib oʻtdi.

Tadbirda soʻz yuritganlar globallashuv sharoitida jamiyatimizdagi ijtimoiy-maʼnaviy muhit barqarorligi va eʼtiqod erkinligiga tahdid tugʻdirishi mumkin boʻlgan omillarni barvaqt aniqlash va oldini olishga qaratilgan axborot-tahliliy faoliyatni kuchaytirish, diniy va dunyoviy bilimlar uygʻunligini rivojlantirish asosida taʼlim sifatini oshirish boʻyicha barcha zarur choralar koʻrilayotganligi toʻgʻrisida fikr bildirdilar.

-Biz jaholatga qarshi maʼrifat bilan kurashar ekanmiz, maʼrifatimizni yuksaltirishimiz uchun koʻplab kitoblar oʻqishimiz, dunyoviy va yetarli darajada diniy bilimlarga ega boʻlishimiz lozim. Chunki bunday shaxslar qalbida zulmga oʻrin boʻlmaydi. Dinning maqsadini bilgan, uni tushungan inson hech qachon qalbida birovga qarshi yomon niyat-u amal bu yoqda tursin, yomon oʻylar, yomon soʻzlar ham hech qachon oʻylamaydi. Zulm, qahr va adovat boʻlmagan joyda esa jaholat urugʻlari zinhor va zinhor unmaydi. Goʻyoki urugʻ tuproq va suvsiz unib chiqa olmas ekan jaholat ham xuddi shunday, zulm va adovatsiz, qahrsiz quruq toshga aylanadi. Shunday ekan bunday toshlarga aslo suv va tuproq, havo berib uni qahr urugʻiga aylantirmasligimiz lozim. Butun dunyoning tiragi, millatlar kelajagi boʻlgan yoshlari birlashsagina, jaholatga qarshi maʼrifat bilan kurashib, maʼrifat bayrogʻini baland koʻtarishga qodir boʻladi, — deydi Respublika Maʼnaviyat va maʼrifat markazi Kogon shahar boʻlinmasi rahbari U.Qurbonov.

Yurtboshimiz Shavkat Mirziyoyev taʼbiri bilan aytganda, biz bugun jaholat degan baloga iqtisodiyot sohasida ham, taʼlim-tarbiya, sogʻliqni saqlash, madaniyat tizimida ham, qoʻying-ki, hayotimizning barcha jabhalarida duch kelyapmiz va bu illat qoʻl-oyogʻimizda bamisoli kishan boʻlib turibdi. Bu kishandan xoli boʻlmasdan turib, taraqqiyot va rivojlanish haqida hech qanday soʻz boʻlishi mumkin emas.

Mohigul Rahimqulova,

“Adolat” SDP Buxoro viloyat Kengashi matbuot kotibi.