Madaniyatimiz qayerga qarab ketmoqda?

Madaniyatning insoniyat jamiyati shakllanishi va taraqqiyotidagi rolini toʻgʻri belgilash muhim nazariy va amaliy ahamiyatga egadir. Har bir milliy madaniyat insoniyat madaniyatidan ajralgan holda rivojlana olmaydi. Milliy madaniyatlar bir-biriga taʼsir koʻrsatadi, bir-birini boyitadi va ijtimoiy-siyosiy munosabatlarini yanada takomillashtirishda muhim omil boʻlib xizmat qiladi. Aslida madaniyat insonni hayvondan, jamiyatni esa tabiatdan farqlaydigan sifat belgi, faqat insonga va jamiyatgagina xos boʻlgan, uning xatti-harakatlari, faoliyati va mehnat mahsulotlarida namoyon boʻladigan bilimlar, tajribalar, koʻnikmalar, majmuasidir. Afsuski, bugungi kunda ushbu nazariyalarning aksariyat hollarda aksi boʻlyapti desak adashmagan boʻlamiz.

Bugun texnologiya asrida yashayotgan bir vaqtimizda, bizning jamiyatimizga internet tarmoqlari yoki boʻlmasa ommaviy axborot vositalari orqali bemalol kirib kelayotgan turli millat madaniyatlari nafaqat yoshlarimizning balki madaniyat sohasida xizmat qilayotgan, vakillarning ham ijodlariga oʻz taʼsirini koʻrsatmay qolmayotir. Aynan misol keltirsak “Kaniza” taxallusi ostida ijod qilayotgan xonandamiz oxirgi vaqtlarda juda noodatiy kliplar suratga olib, undagi voqea holatlari umuman mentalitetimizga toʻgʻri kelmaydigan va behayo sahnalar aks ettirilganligi sababli hozirda ushbu xonandaning kelgusida ijodini davom ettirishi uchun litsenziya berish taqiqlandi.

Garchand bu vaqtinchalik cheklov boʻlsa-da, xonandalarimiz bunday cheklovlardan va qarshiliklardan oʻzlariga xulosa chiqarishning oʻrniga internet tarmoqlari orqali, oʻz xatolarini oqlash maqsadida ularga nisbatan nohaqlik qilinayotganini gapirib chiqishmoqda. Keling endi bir oʻylab koʻramiz- agar mana shu zayilda biz ijod qilishda, gʻarb madaniyatini targʻib qilishni davom ettirsak, kelgusida bizdan keyingi yosh avlodning tarbiyasi qayerga qarab ketadi? Kimlardan oʻrnak oladi va kimlarga oʻxshashga harakat qiladi?

Bu kabi koʻplab savollar ochiqligicha qolaveradi, zero biz madaniyat deb atayotgan ushbu yoʻnalishni ham chiroyli va tarbiyaviy tomonga koʻproq yoʻnaltirmas ekanmiz. Ammo milliy ruhda ijod qilib Davlatimiz nomini yuksaklarga koʻtarib uning maʼnaviyatini axloqiy meʼyorga sola oladigan darajada ijod qilib kelayotgan, koʻplab xonandalarimiz bor albatta. Darhaqiqat biz bunday ijodkorlar bilan faxrlanamiz, ularning ijod yoʻlini namuna qilib ham yoshlarimizga koʻrsata olyapmiz va albatta oʻylaymanki mana shunday madaniyatli ijodkorlarimizning ijodlari, ayrim qoʻshtirnoq ichidagi oʻzicha xonanda yoki yulduzlik kasaliga uchrab- menga hamma narsa mumkin deb oʻylaydigan xonandalarning bugungi kundagi ayblarini tarbiyalashga koʻmaklashadi.

Sanobar Mirsaidova,

Xalq Deputatlari Samarqand viloyat Kengashi deputati.