Mahallada salomatlik kuni

Inson salomatligi haqida gapirganda toʻgʻri ovqatlanish alohida oʻrin tutadi. Chunki oʻz salomatligini istagan inson ovqatlanish tartibini ham bilishi, bu borada mutaxassis maslahatiga amal qilishi lozim. Biroq hamma ham birdek ovqatlanish qoidalariga rioya qiladimi?

Andijon davlat tibbiyot instituti talabalaridan tarkib topgan “Adolatchi”-“Volontyorlar” jamoasi aʼzolari Xoʻjaobod tumanidagi Uzunkoʻcha mahallasida yashovchi aholi vakillari oldiga ana shunday savol qoʻydilar. Dastlab sogʻlom turmush tarzi va ertalabki badantarbiya xususida tadbir qatnashchilariga tushuncha berildi.

Sogʻlom turmush tarzi doirasidagi tadbir davomida toʻgʻri ovqatlanish, kundalik iste’mol qilinadigan mahsulotlar orasidan joy olishi zarur boʻlgan meva va sabzavotlar, ularning foydali xususiyatlari haqidagi maʼruzalar tinglandi. Salomatlik dasturxoni atrofida keksalar va bolalar uchun tavsiya etiladigan oziq- ovqat mahsulotlarining foydaliligi ishtirokchilarga amaliy koʻrsatildi.

MFY hududidagi 4-maktabda tashkil etilgan sport musobaqalari ham salomatlik tadbiriga aylandi.

“Adolat” SDP Andijon viloyat kengashi

Matbuot xizmati.