Mahallada yangi Konstitutsiya targʻiboti

Oʻzbekiston “Adolat” SDP Qoraqalpogʻiston Respublikasi Kengashi tomonidan 30-aprel kuni oʻtkaziladigan umumxalq referendumi munosabati bilan yangi Konstitutsiyaning mazmun-mohiyatini xalqimizga keng tanishtirish maqsadida barcha shahar va tumanlarda targʻibot tadbirlari oʻtkazilib kelinmoqda.

Ana shunday tadbirlarning biri joriy yil 13-aprel kuni Xoʻjayli tumanida joylashgan “Kun nuri” mahalla fuqarolar yigʻinidagi 18-sonli umumtaʼlim maktabida “Yangilanayotgan Konstitutsiya – inson qadri uchun” mavzusida oʻtkazildi.

Tadbirda partiya Qoraqalpogʻiston Respublikasi Kengashi raisi Nurlibay Qaipbergenov, partiya hududiy Kengashi raisi oʻrinbosari Rauaj Otarbayev, Xalq deputatlari Xoʻjayli tumani Kengashi deputati Anvar Qaypbayev va ushbu mahallada istiqomat qiluvchi yoshi ulugʻ otaxon va onaxonlar, oʻqituvchi-murabbiylar hamda ommaviy axborot vositalari vakillari ishtirok etishdi.

Tadbirni partiya Qoraqalpogʻiston Respublikasi Kengashi raisi Nurlibay Qaipbergenov kirish soʻzi bilan ochib berdi va boshqarib bordi.

Dastlab partiya Qoraqalpogʻiston Respublikasi Kengashi raisi oʻrinbosari Rauaj Otarbayev soʻzga chiqib, Yangilanayotgan Konstitutsiyamiz matni “Inson-jamiyat-davlat” gʻoyasi asosida yozilganligini alohida taʼkidladi.

Yangilanayotgan Konstitutsiyamizda kambagʻallikni qisqartirish, bandlikni taʼminlash, ishsizlikdan himoya qilish boʻyicha davlat oʻziga qator yangi majburiyatlar olishini taʼkidlab, davlatning ijtimoiy sohadagi majburiyatlari bilan bogʻliq normalar 3 barobar koʻpaytirilganligini keltirib oʻtdi.

Shular qatori Orolboʻyi mintaqasining ekologik tizimini muhofaza qilish hamda tiklash masalalari ham bosh qomusimizda mustahkamlanayotganligiga toʻxtaldi.

Shundan soʻng Xalq deputatlari Xoʻjayli tumani Kengashi deputati Anvar Qayipbayev soʻzga chiqib, yangilanayotgan Oʻzbekiston Respublikasi Konstitutsiyasi oila, bolalar va yoshlar mavzusiga alohida bob ajratilayotganligini, yoshlar masalasi, ayniqsa onalik, otalik va bolalik davlat tomonidan muhofaza qilinishi kafolatlanganligiga urgʻu berdi.

Shuningdek, tadbir davomida maʼruzachilar tomonidan yangilanayotgan Konstitutsiyamizda mamlakatimizning kelajagi boʻlmish yoshlarga va xotin-qizlarga qaratilayotgan eʼtibor hamda yaratilayotgan yangi imkoniyatlar yuzasidan ham keng maʼlumotlar berilib, ishtirokchilarning fikr va mulohazalarga tinglandi.

Oʻzbekiston “Adolat” SDP
Qoraqalpogʻiston Respublikasi
Kengashi matbuot xizmati