Maktabdagi qulayliklar xalq vakillarini mamnun etdi

Yurtimiz ijtimoiy-iqtisodiy  taraqqiyotining yagona yo‘li ilm va ma’rifatdir. Ilm va ma’rifat taraqqiy etgan,  ustuvor bo‘lgan jamiyatda ma’naviyat yuksaladi, davlat rivojlanadi,  inson haq-huquqlari qaror topib,  qadri ulug‘lanadi. Albatta,  bunga eltadigan yagona yo‘l esa ta’lim va tarbiyadir.

Muborak tumanidagi 1-umumta’lim maktabida 20260 nafar o‘quvchi ta’lim-tarbiya oladi. Ularga 146 nafar pedagoglar fan sirlarini puxta o‘rgatib kelishayapti. Bugun ushbu maktabga kuz qish mavsumiga tayyorgarlik qay ahvolda? Oliy Majlis Qonunchilik palatasi deputati Maxfurat Xushvaqtova ta’lim maskanida bo‘lib maktabning infratuzilmasi, fan xonalari, laboratoriyalarni ko‘zdan kechirdi. Shunisi e’tiborliki maktabda o‘qituvchilar va o‘quvchilar uchun barcha shart-sharoitlar muhayyo etilgan. Sinf xonalari va laboratoriyalar zamonaviy o‘quv qurollari bilan ta’minlangan. Maktab kuz qish mavsumiga ham har tomonlama tayyor. O‘qituvchi va o‘quvchilar yangi o‘quv yiliga har tomonlama yaxshi tayyorgarlik bilan kelishayapti. Quvonarli tomoni shundaki, ushbu maktab xalq vakillari tomonidan tumandagi eng namunali ta’lim muassasasi deb e’tirof etildi.

Shuningdek Oliy Majlis Qonunchilik palatasidagi “Adolat” SDP fraksiyasi a’zosi Maxfurat Xushvaqtova fuqarolar bilan ham uchrashdi. Unda tumandagi ko‘pgina mahalla va qishloqlarda umrguzaronlik qilayotgan fuqarolar o‘z hududlarida muammo bo‘layotgan toza ichimlik suvi hamda tabiiy gaz yetkazib berishdagi uzilishlar xususida murojaat qilishdi. Deputat fuqarolarni qiynab kelayotgan muammolarni mutasaddi idoralar mas’ulari ishtirokida bartaraf etishga erishdi.

“Adolat” SDP Qashqadaryo viloyat 

Kengashi matbuot xizmati.