Maktabga bormayotgan ota-onalar

Sarlavhani oʻqib birdan xulosa chiqarishga shoshilmang. Farzandining maktabiga borib uning oʻqishi, tarbiyasi borasida ustozlari bilan maslahatlashmaydigan ota-onalar oramizda yoʻq emas. Hatto yilda bir bor chaqiriladigan ota-onalar yigʻilishida qatnashishga vaqt topolmaydiganlarchi... Yana farzandi ulgʻaygach oʻz yoʻlini topa olmasa maktabni ayblovchilar ham bor. Bu albatta ogʻriqli masala.

Yuqoridagilardan kelib chiqib, Oʻzbekiston “Adolat” SDP Andijon tuman kengashi tashabbusi bilan “Vatan kelajagi yoshlar qoʻlida” loyihasi doirasida tumandagi 33-maktabda “Sifatli taʼlimga ota-ona javobgar” shiori ostida tadbir tashkil etildi. Unda sinflardagi ota-onalar qoʻmitalarining raislari ishtirok etdi.

2141 nafar oʻquvchi bilim olayotgan mazkur taʼlim muassasasida olib borilayotgan ishlar oʻrganildi, ota-onalar bilan hamkorlikni yoʻlga qoʻygan bolalarning oʻqishi yaxshi ekani eʼtirof etildi. Aksincha oʻzlashtirishi past boʻlgan ayrim oʻquvchilarning ota-onalar takror taklif qilinsa-da maktabga kelmasligi tanqid qilindi. Ota-onalar qoʻmitalari oldiga aynan ana shular bilan ishlash vazifasi qoʻyildi.

Nilufar Karimova, maktab direktori:

-“Adolatchilar”ning bu tashabbusi juda oʻrinli, qoʻllab-quvvatlaymiz. Bolaga bilim berishni oʻqituvchining bir oʻziga tashlab qoʻyish notoʻgʻri. Agar ota-ona ham maktabga kelib tursa oʻquvchining masʼuliyati ortadi. Taʼlim sifatini oshirish, boʻsh vaqtlardan unumli foydalanish, huquqbuzarliklarni oldini olish va kasbga yoʻnaltirishda hamkorlik zarur.

Tadbir yakunida ota-onalar yigʻilishlarini har chorakda oʻtkazib borish, tarbiyasi ogʻir oʻquvchilarning ota-onalari bilan ishlash vazifasi belgilab olindi. Bu ishga partiya faollari va mahalliy kengash deputatlari ham jalb etildi.

“Adolat” SDP Andijon viloyat kengashi

Matbuot xizmati.