Maktabgacha taʼlim tashkilotida bayram shukuhi…

Vobkent tuman 9-son maktabgacha taʼlim tashkilotida Mustaqilligimizning 32 yilligi munosabati bilan “Yangi Oʻzbekistonni birgalikda quramiz” shiori ostida maʼnaviy-maʼrifiy tadbir boʻlib oʻtdi.

Unda partiya Xalq deputatlari tuman Kengashi deputati, Vobkent tuman Kengashi raisi, Mahbuba Roʻziyeva, “Xayrxush” MFY raisi Dilshod Joʻrayev, partiya faollari Gulsara Tosheva, Gulmira Sharopova,   MTT xodimlari, MTTda tarbiyalanuvchi bolajonlar, ota-onalar hamda keng jamoatchilik vakillari ishtirok etdilar.Bayram tadbirida partiya mehmonlar soʻzga chiqib, barchani Mustaqilligimizning 32 yillik shodiyonasi bilan tabrikladilar.

Bundan tashqari, mazkur muassasaning tayyorlov guruhi tarbiyalanuvchilari bogʻcha bilan xayrlashib maktabning 1-sinfiga qadam qoʻyishadi. Ushbu munosabat bilan tarbiyalanuvchilar tomonidan ajoyib bayram dasturi namoyish etildi. Unda bolajonlar oʻzlarining turli chiqishlari bilan tadbirni yanada qiziqarli boʻlishini taʼminladilar.

Ayniqsa, ular ijrosida vatanni madh etuvchi sheʼr- qoʻshiqlar, maqol va hikmatli soʻzlar turli sahna koʻrinishlari barchaga quvonch baxsh etdi.Maʼlumot oʻrnida aytadigan boʻlsak, mazkur muassasada 150da ziyod oʻgʻil-qiz tarbiyalanmoqda. Rus-ingliz tillari, raqs, shaxmat-shashka, gimnastika toʻgaraklari bolajonlar vaqtini maroqli oʻtishini taʼminlayotir.

Darhaqiqat, mamlakatimizda maktabgacha taʼlim tizimini takomillashtirish, uning moddiy-texnik bazasini mustahkamlash, malakali pedagoglar bilan taʼminlash, taʼlim-tarbiya jarayonida zamonaviy taʼlim dasturi va texnologiyalarni tatbiq etish borasidagi ishlar bolalarni maktab taʼlimiga tayyorlash darajasini tubdan yaxshilashga xizmat qilmoqda. Mustaqilligimizning 32 yillik arafasida tashkil etilgan ushbu tadbir doirasida bogʻchaning bir guruh tarbiyachilari ham tashakkurnoma va faxriy yorliqlar bilan taqdirlandilar.

Tadbirda bayram dasturiga bagʻishlab tayyorlangan kuy-qoʻshiqlar, raqs va sahna koʻrinishlari bolajonlar tomonidan mohirlik bilan ijro etilib, yigʻilganlarga xush kayfiyat ulashdi.

Mohigul Rahimqulova,

“Adolat” SDP Buxoro viloyat Kengashi matbuot kotibi.