Manzilli rejalar va maqsadlar koʻngillar obodligiga xizmat qiladi

Muhtaram Prezidentimizning Qoraqalpogʻiston Respublikasiga boʻlgan navbatdagi tashrifi, hududda yashovchi barcha keksayu-yoshlarning qalbiga birdek iliqlik, quyoshdek mehr nurlarini olib kirgani ayni haqiqat.

Bugun qaysi mahalla, qaysi koʻchaga yoki qaysi xonadonga borsangiz ham asosiy mavzu Prezident tashrifi yakunlari, hududga koʻrsatilayotgan eʼtibor, aholiga berilayotgan imtiyoz, iqtisodiyotni taraqqiy ettirishga qaratilgan, manzilli maqsadlar boʻyicha maroqli suhbatga guvoh boʻlasiz.

Haqiqatan ham Muhtaram Prezidentimiz rahnamoligida Qoraqalpogʻiston soʻngi 5-6 yilda dehqonchilik va chorvachilikdan tashqari, zamonaviy tadbirkorlik va sanoatni rivojlantirishga, aholi farovonligini yuksaltirish, yoshlar uchun keng imkoniyatlar yaratishga yuksak eʼtibor qaratilmoqda.

Eng dastlab Moʻynoqdan boshlangan ezgu tashabbuslar, hududning barcha tumanlarida davom etayotganligi, odamlarning bugundan rozi boʻlib, ertangi kunga ishonch bilan qarab, baxtiyorlik, shukronalik tuygʻulari bilan yashashiga xizmat qilmoqda.

Prezidentimiz tashrifi, kun davomida oʻtkazilgan samimiy uchrashuvlar, shirin suhbatlar, Qoraqalpogʻistonning buguni va yorqin istiqboli uchun belgilangan aniq maqsadli rejalar — bularning hammasi, Qoraqalpogʻistonda yashovchi har bir insonning yurak tubiga kirib bordi desak, mubolagʻa boʻlmaydi.

Oldinlari umuman sanoat korxonasi boʻlmagan Kegeyli tumanida hududlararo hamkorlik natijasida, Andijonlik tadbirkorlar bilan birgalikda yiliga 3 million donadan ziyod trikotaj ishlab chiqarish quvvatiga ega “Aqtuba tekstil” korxonasi ishga tushirildi.

Germaniya, Yaponiya va Turkiyadan olib kelingan zamonaviy uskunalar ishlab chiqarish hajmining koʻpayishiga xizmat qilmoqda.

Asosiysi, ushbu tumanda yashovchi, ishsiz uyda oʻtirgan ayollar uchun doimiy ish oʻrni yaratildi.

Korxona 500 ta ish oʻrniga ega boʻlib, yiliga 6 million dollarlik mahsulot eksport qilish rejalashtirilgan.

Davlatimiz rahbari tashrifini ushbu korxona faoliyati bilan tanishuvdan boshladi, korxonadagi ish jarayonini koʻzdan kechirdi, ishchi ayollar bilan samimiy suhbatlashdi.

Prezidentimiz tomonidan shu kunning oʻzida video aloqa orqali 6 ta yangi korxona ishga tushirildi.

Ular Beruniy tumanidagi “Beruniy bugʻdoy klaster” hamda “Rayhon apparel”, Qoraoʻzak tumanidagi “Qoraqalpoq sement” zavodining 3-bosqichi, Qoʻngʻirot tumanidagi “KKRasi kemikal”, Nukus shahridagi “Azimut hotel”, Toʻrtkoʻl tumanidagi “Xozagro” korxonalari hisoblanadi. Bu korxonalarda jami 1 ming 100 ta doimiy ish oʻrni yaratiladi, ular orqali ishlab chiqarishga 300 milliard soʻm, eksportga 20 million dollar qoʻshiladi.

Albatta, yangidan ishga tushayotgan ushbu korxonalar, aholi bandligi, oilalar farovonligi, iqtisodiyotimiz taraqqiyotiga asos boʻladi.

Prezidentimiz Qoraqalpogʻiston Respublikasini iqtisodiy-ijtimoiy rivojlantirish masalalari muhokamasi boʻyicha oʻtkazilgan yigʻilishda, Qoraqalpogʻiston mahallalarini obod qilish, suv, yoʻl, elektr taʼminotini yaxshilash, maktab, bogʻcha va tibbiyot punktlarini qurish va taʼmirlash uchun 2023 yilda 1,5 trillion soʻm berilayotganini taʼkidladi.

Shuningdek, 452 ta mahalladagi sharoiti ogʻir 21 mingta xonadon taʼmirlanib, 709 ta uylar yangitdan qurib berilishi uchun byudjetdan 132 milliard soʻm, Toshkent shahri va viloyatlardan 232 milliard soʻm ajratilayotganligi, Qoraqalpoq xalqiga boʻlgan otalarcha eʼtibor va ishonch namunasidir.

Albatta, berilayotgan mablagʻlar hajmi katta, ushbu mablagʻlar zamirida esa, odamlarni hayotdan rozi qilishdek, yuksak insoniylik maqsad mujassam.

Davlatimiz rahbari tomonidan Qoraqalpogʻiston uchun ahamiyatli boʻlgan, shu yerda yashovchi aholining farovonligini yanada oshirishga qaratilgan 3 ta yangi tashabbus, nafaqat bugun, kelajakda ham odamlarning oʻz hayotidan roziligiga xizmat qilishi aniq.

Birinchi tashabbus, Qoraqalpogʻistondagi 452 ta mahallaning har biriga toʻgʻridan-toʻgʻri 500 million soʻmdan qoʻshimcha mablagʻ ajratiladi.

Buning uchun alohida Qoraqalpogʻiston mahallalarini qoʻllab-quvvatlash jamgʻarmasi tashkil qilinib, unga joriy yilda 250 milliard soʻm ajratish belgilandi.

Ikkinchi tashabbus, kadastri yoʻq 38 ming uy-joy va koʻchmas mulklar boʻyicha tegishli hujjatlar qilib beriladi.

Uchinchisi, aholi talabini inobatga olib, joriy yilda 4 mingta uy-joy quriladi. Bunga qoʻshimcha, zamonaviy loyiha asosida 4 ming yakka tartibdagi uy-joy qurishga 4 sotixdan yer ajratiladi.

Haqiqatan ham 3 ta yangi tashabbus va Qoraqalpogʻistonni “ishsizlikdan xoli hudud”ga aylantirish, oziq-ovqat mahsulotlari moʻl va arzon boʻlishini taʼminlash, ichimlik suvi taʼminoti, magistral va ichki yoʻllarni taʼmirlash, maktabgacha taʼlim muassasalarini qurish, maktab va tibbiyot maskanlarini taʼmirlash kabi koʻp sonli aniq maqsadli rejalar, jamoli kun-kundan yangilanayotgan Qoraqalpogʻistonda yashovchi koʻp millatli aholining koʻngliga obodlik olib kiradi, bugungi farovon hayotiga, ertangi nurli kelajagiga asos boʻlib xizmat qiladi.

Xulosa oʻrnida aytadigan boʻlsak, bugun biz Qoraqalpogʻistonliklar davlatimiz tomonidan koʻrsatilayotgan eʼtibor, yaratilayotgan imkoniyat, berilayotgan imtiyozlar, xalqning buguni va yosh avlod kelajagi uchun qilinayotgan ezgu tashabbuslar uchun Prezidentimizdan minnatdormiz.

Nurlibay QAYIPBERGENOV,
Oʻzbekiston “Adolat” SDP
Qoraqalpogʻiston Respublikasi Kengashi raisi.