Maqsadlar ijtimoiy sohalarga qaratilgan

“Oʻzbekiston-2030” strategiyasi muhim tarixiy hujjat boʻlib, kelgusi 7 yilda amalga oshirilishi lozim boʻlgan islohotlar strategiyasini qamrab olgan. Bu siyosiy hujjat Yangi Oʻzbekiston kelajagi uchun, insonlar taqdiri uchun juda muhimdir. Beshta ustuvor yoʻnalish boʻyicha 100 ta maqsad belgilab olingan. Har bir yo’nalishda koʻzlangan marralarimiz, xalqimizning yaxshi yashashi va farovon turmush kechirishiga qaratilgan maqsadlar, vazifalar, ijrochilar, masʼullar aniq belgilab berilgan.

Strategiya bilan tanishar ekanmiz ijtimoiy sohaga koʻproq eʼtibor qaratilganiga guvoh boʻlamiz. Masalan, 22-29-maqsadlarda ijtimoiy xizmatlar koʻrsatish va kambagʻallikni qisqartirish boʻyicha islohotlar oʻrin olgan. Bu maqsadlarda ijtimoiy himoya qilish tizimi bilan muhtojlarning barchasini toʻliq qamrab olinishiga erishish belgilanmoqda. Bu mamlakatimizda barcha ijtimoiy himoyaga muhtoj fuqarolarimiz ijtimoiy himoya qilinishini anglatadi. Bundan koʻrinib turibdiki, har bir inson bugun davlat himoyasida, ayniqsa, ijtimoiy himoyaga muhtoj, nogironligi boʻlgan va kam taʼminlangan insonlar yagona reyestri tashkil etiladi va xatlovdan oʻtkaziladi. Shuningdek, ijtimoiy xizmatlarni majmuaviy amalga oshirish uchun respublikamizning barcha tuman va shaharlarida “Inson” ijtimoiy xizmatlar markazlari faoliyati tashkil etilishi belgilanmoqda. Ijtimoiy himoyaga muhtoj aholi qatlamining manzilli va tizimli himoyasi taʼminlanadi. Bizning partiyamiz elektoratining ijtimoiy himoyasi saylovoldi dasturimizda ilgari surilgan gʻoya va maqsadlarimizga toʻliq mos keladi.

Bundan tashqari, strategiyada mamlakatda kambagʻallik darajasini qisqartirish ham oʻrin olgan boʻlib, 2026-yilga qadar kambagʻallikni 2022-yilga nisbatan 2 barobarga, 2030-yilga qadar esa keskin qisqartirish hamda kambagʻallikka tushish xavfi mavjud 4,5 million aholi daromadini oshirish kabi muhim vazifalar belgilab olinmoqda. Buning uchun albatta tizimli ishlar xonadonday, fuqarobay ishlar tashkil etiladi. Kasb-hunarga oʻqitish va ish bilan taʼminlashga alohida eʼtibor qaratiladi. Pirovardida partiyamizning elektorati boʻlgan fuqarolarning yashash sharoiti oʻzgaradi. Hayotda oʻz oʻrni va kelajagini belgilab beruvchi muhim islohotlardan rozi boʻladi. Muhimi “inson qadri”, degan shior amalda oʻz isbotini topadi.

Shuningdek, keksa avlod vakillariga ham gʻamxoʻrlik qilish borasidagi islohotlarimiz izchil davom etadi. 26-maqsadda nuroniylarni har tomonlama qoʻllab-quvvatlashda har yili bir milliondan ortiq nuroniylar uchun respublika boʻylab diqqatga sazovor joylar, xususan tarixiy shaharlar, qadimiy obidalar, ziyoratgohlar va yurtimizning soʻlim goʻshalariga sayohatlar tashkil etish, nuroniylarni qoʻllab-quvvatlash dasturlarida amalga oshiriladigan tadbirlarni kamida 30 foizga oshirish belgilab berilmoqda. Mamlakatimizda qariyalar, nuroniy otaxon u-onaxonlarimiz doimiy davlatimiz eʼtiborida boʻladilar. Uch avlod uchrashuvlari, har oʻn yoshga bir faxriyning biriktirilishi ularning qadrini va qaddini koʻtarishi shubhasiz.

Biz xalq vakillari ham ushbu yetti yilga moʻljallangan strategiyamizning maqsadlarini aniq va puxta bajarilishida faol boʻlishimiz zarur deb hisoblayman. Buning uchun oʻz saylovchilarimizga ushbu muhim tarixiy hujjatning mazmun-mohiyatini tushuntirib borishimiz, belgilangan vazifalar ijrosida jamoatchilik nazoratini oʻrnatishimiz muhim. Har bir fuqaroning hayotida muhim boʻlgan islohotlar ijrochisiga aylanish, har bir insonning oʻziga bogʻliq.

Shunday ekan islohotlar tashabbuskori boʻlish, Vatan taqdiri, kelajagiga befarq boʻlmasak oʻzimiz orzu qilgan Yangi Oʻzbekistonni barpo eta olamiz.

“Adolat” partiyamiz va partiyadan saylangan deputatlarimiz ushbu strategiyada belgilangan ustuvor yoʻnalishlarni amalga oshirishda kelgusi ishlarimizda asosiy maqsad qilib qoʻyamiz.

Qahramon Rahimov,

“Adolat” SDP Bogʻot tuman Kengashi raisi,

tuman Kengashi deputatlik guruhi rahbari.