Mard va jasur harbiylarimiz — chinakam vatanparvar bahodirlar

Dunyoda ulugʻ va sharafli kasblar koʻp. Ana shular orasida eng sharaflisi va mashaqqatlisi oʻz ona Vatani va xalqining tinchligi uchun xizmat qilishdir. Bugungi kunda Qurolli kuchlarimiz ming-minglab oʻgʻlonlarimiz uchun chinakam mardlik, fidoyilik, haqiqiy vatanparvarlik hamda matonat maktabiga aylangani, hech shubhasiz, shu yoʻlda erishgan eng katta yutugʻimizdir. Bu haqiqatni jonajon yurtimizdagi barcha ota-onalar, qolaversa butun xalqimiz gʻurur bilan, minnatdorchilik bilan eʼtirof etmoqda. Hozirgi kunda biz kabi ota-onalar oʻz farzandlarini harbiy xizmatga qoʻrquv aralash koʻzda yosh, yurakda ming bir xavotir bilan emas, balki mening oʻgʻlim haqiqiy Vatan himoyachisi boʻladi, deb, yuksak umid hamda ishonch va faxr tuygʻusi bilan kuzatmoqda. Mustaqil yurtimizda boʻlgani kabi viloyatimizda ham ofitserlar va serjant kadrlarni tayyorlash hamda malakasini oshirishning zamonaviy talablarga javob beradigan samarali tizimi yaratildi. Birgina Qarshi shahridagi Serjantlar tayyorlash dargohida har yili yuzlab har tomonlama jangovar tayyorgarliklarga qodir boʻlgan yoshlar tayyorlanyapti. Harbiy xizmatni oʻzining kasbi, Vatan va xalq oldidagi muqaddas burchi deb bilgan fidoiy oʻgʻlonlarimizni sharaflash, ularga ehtirom koʻrsatish har birimiz uchun ham qarz, ham farzdir.

Darhaqiqat, bugun dunyoning turli davlatlarida notinchlik, xavf-xatarlar, milliy va global xavfsizlikka qarshi tahdidlar tobora ortib borayotgan hozirgi murakkab davrda Qurolli Kuchlarimizning jangovar salohiyatini yuksaltirish, uning moddiy-texnik bazasini mustahkamlash, eng zamonaviy qurol-yarogʻ va aslahalar bilan taʼminlash, harbiy xizmatchilarning jismoniy, maʼnaviy-intellektual tayyorgarligini oshirish, ijtimoiy himoyasini kuchaytirish eng ustuvor vazifa boʻlib qolayotganligi hech kimga sir emas. Bu borada ayniqsa, muhtaram Yurtboshimiz rahbarligida olib borilayotgan ishlar diqqatga sazovordir. Ayni paytda davlatimizning harbiy-siyosiy masalalar boʻyicha qatʼiy pozitsiyasini ifoda etadigan yangi Mudofaa doktrinasi ishlab chiqildi. Barcha jabhada jumladan, Qurolli kuchlarimiz tizimida amalga oshirilayotgan tub islohotlar natijasida milliy armiyamiz har tomonlama tezkor va ixcham, har qanday qarshilik, tahdidlarga munosib zarba berishga qodir boʻlgan jangovar kuchga aylanib bormoqda. Bizning asosiy vazifamiz har bir harbiy xizmatchining professional bilim va malakasi, aqliy salohiyati, ruhiy tayyorgarligini oshirish, ularda vatanparvarlik fazilatlarini kamol toptirishga oʻz hissamizni qoʻshishimiz kerak.

Shuningdek, jahon axborot makonida keskin kurash ketayotgan hozirgi vaziyatda muhim obyektlarda axborot xavfsizligini taʼminlash boʻyicha kompleks chora-tadbirlarni ishlab chiqish va amalga oshirish ham davr talabidir. Harbiy xizmatchilarning jangovar ruhi, intellektual salohiyatini yuksaltirish, aholi, birinchi navbatda yoshlarni harbiy-vatanparvarlik ruhida tarbiyalash, harbiy xizmatchilar, ularning oila aʼzolari, Qurolli Kuchlarimiz faxriylarini ijtimoiy va huquqiy jihatdan muhofaza qilishni kuchaytirish borasida ham bir qancha ishlar amalga oshirildi.

Ana shunday buyuk tarixiy jarayonda xalqimizning harbiy sohadagi boy merosiga tayanib, Jaloliddin Manguberdi, Sohibqiron Amir Temur, Zahiriddin Muhammad Bobur kabi buyuk sarkarda bobolarimizning jangovar anʼanalarini munosib davom ettirib kelayotgan, jismoniy va maʼnaviy yetuk, zamonaviy bilim, qurol-yarogʻ va texnikalarni puxta egallagan, davlat va xalq manfaatlari uchun har qanday sinov va mashaqqatlarni yengib oʻtishga tayyor boʻlgan harbiylarimiz doimo faol ishtirok etib kelayotganlari har qanday yuksak eʼtirofga munosibdir.

Ushbu qutlugʻ ayyomda oʻz hayotini Vatan himoyasidek ulugʻ ishga bagʻishlagan Siz, azm-u shijoatli milliy gvardiya xodimlarini sharaflab, xalqimiz, mamlakatimiz tinchligi va xavfsizligi yoʻlidagi xizmatlaringiz uchun barchangizga chuqur minnatdorlik bildiramiz. Chegaralarimiz daxlsiz, osmonimiz musaffo boʻlsin. Barchangizni Oʻzbekiston Qurolli Kuchlari tashkil etilganining shonli 31 yilligi va Vatan himoyachilari kuni bilan yana bir bor tabriklaymiz!

Xalqimiz oʻzining Sizlar kabi botir va dovyurak farzandlari – Vatanimizning haqiqiy posbonlari bilan haqli ravishda faxrlanadi. Mustaqil diyorimizga sadoqat bilan xizmat qilishdan hech qachon charchamang, mard va jasur Vatan posbonlari!

Ulugʻbek Ashirov,

partiya faoli.