Marrani yanada baland oldim

Har bir inson nafaqat har bir kunini balki yil yakunida bosib oʻtgan izini tahlil qiladi, erishgan yutuqlarini bir-bir yodga oladi, sarhisob qiladi.

Men ham 2022-yil davomida bosib oʻtgan izimga bir nazar tashladim va koʻnglimni ancha ravshan qilgudek, yil boʻyi menga kuch-quvvat, shijoat, ruhan tetiklik bagʻishlagan yutuqlarimni bir-bir esladim.

Qayd qilish joizki, 2021-dekabr oyida partiya tashabbusi bilan ijtimoiy tarmoqlar orqali tashkil etilgan “Yilning eng faol adolatchi ayoli” koʻrik-tanlovida gʻoliblikni qoʻlga kiritganim va partiya Siyosiy Kengashi tomonidan “Yilning eng faol adolatchi ayoli” deb topilganim 2022-yil davomida menga ishchanlik kayfiyatini berdi, desam toʻgʻri boʻladi

27-iyun — Matbuot va OAV xodimlari kuni munosabati bilan 2022-yil “Oʻzbekiston jurnalistlar ijodiy uyushmasi” aʼzosi nomli yangilangan guvohnoma va yangi taʼsis etilgan koʻkrak nishoni, partiya Siyosiy Kengashning va partiya Xorazm viloyat Kengashining tashakkurnomasi hamda esdalik sovgʻalari bilan taqdirlanganimda bir olam quvonch-u shodlikka toʻlgan boʻlsam, Konstitutsiyamizni 30 yilligi munosabati bilan “Oʻzbekiston Respublikasi Konstitutsiyasini 30 yilligi” koʻkrak nishoni koʻksimga taqilganida Vatanimga, Oʻzbekistonimga boʻlgan mehrim, sadoqatim yanada mavj urdi.

Erishgan yutuqlarimning negizida tinch va osuda yurtimizda emin-erkin, isteʼdodim va qobiliyatimni boricha namoyon etishga zamin va imkoniyatlar yaratilgani, inson qadrini ulugʻlash tamoyilini oʻz mehnatlarim qadrlanganida koʻrish, farzandlarim, nabiralarim kamoli uchun barcha imkoniyatlar bisyorligi, oilamning tinchligi, nufuzli tashkilotning eng ahil jamoasi bilan sevimli ishimda faoliyatimni olib borayotganim, oʻnlab iqtidorli yoshlarni shakllanishida munosib hissam borligi, Oʻzbekistonimizning dunyo hamjamiyatidagi munosib oʻrni, ehe,  bunday sabablarni koʻplab keltirish mumkin.

Quvonarlisi, Muhtaram Prezidentimizning Oliy Majlis va Oʻzbekiston xalqiga yoʻllagan Murojaatnomasida yurtimiz obodligi uchun ilgari surilgan ilgʻor gʻoyalarni eshitib, yanada kuchliroq mehnat qilish, tashabbuskor boʻlish oʻz-oʻzidan maqsadimga aylandi.

“Inson qadrlangan joyda baxtli”, degan iborani nechogʻlik haqiqat ekanini faoliyatimda yurak-yurakdan his qilaman.

Xizmat safari bilan fuqarolardan, ayniqsa, nuroniylarimiz insonlari qadrlangan yurtimizga koʻz tegmasin, deya shukronalik bilan duo qilishlaridan, yanada kuchga toʻlaman, ilhomlanaman.

Men ham bugun mehnatlarim qadrlangan yurtda, marrani yanada baland olib, inson qadr va qiymatini baland va har narsadan ustun qoʻygan yurtimning iqboli porloq boʻlsin, deya bor kuch-gʻayratimni Yangi Oʻzbekistonimiz kelajagi uchun safarbar etishdan aslo charchamayman!.

Zamira ABDULLAYEVA,

“Adolat” SDP Xorazm viloyat Kengashi matbuot kotibi,

Oʻzbekiston jurnalistlar ijodiy uyushmasi aʼzosi, shoira