Muammoga yechim topilmoqda

Keyingi yillarda fuqarolarning huquqiy madaniyati oʻsib borayotgani eʼtiborli. Bu ularni amaldagi qonunlardan kelib chiqib oʻz huquqlaridan samarali foydalanishlariga olib kelmoqda. Shu oʻrinda bir misol: tan olib aytish kerak avvallari saylovchilar mahalliy kengash deputatlariga qanday murojaat qilish, oʻzlarini qiynayotgan muammolarning yechimini topishda ular bilan ishlashga eʼtibor qilmasdi. Natijada ayrim xalq vakillari sessiyalarda qatnashishdan nariga oʻtmagani bor gap. Bugun hammasi oʻzgardi. Davlatimiz rahbarining koʻrsatmalari asosida barcha boʻgʻindagi rahbarlar qatori deputatlar ham jamoatchilik orasiga kirib bormoqda. Fuqarolar mavjud muammolarni hal etishda birinchi navbatda oʻz vakillariga suyanmoqda.

Xalq deputatlari Izboskan tuman kengashidagi “Adolat” SDPdan saylangan deputatlar faoliyatidagi jonlanish bunga misol boʻladi. 5 nafar “adolatchi”-deputat doim oʻz saylov hududida, jamoatchilik bilan birga. MFYlarda oʻtkaziladigan faollar yigʻinida oyda bir marotaba ishtirok etib, mahalla hayotini oʻrganib boradilar. Oʻz vakilini koʻrib borgan saylovchilarda ularga nisbatan ishonch ortmoqda.

Soʻzimizning tasdigʻi sifatida amaldagi yilda qilingan ishlarga eʼtibor qarataylik. 30-Namuna saylov okrugidan saylangan deputat Dilfuza Ahmedova qachon qaramang fuqarolar orasida. Ayniqsa. xotin-qizlar bilan ishlashda maktab yaratgan. Shundan boʻlsa kerak murojaatlar soni ortib bormoqda. Deputat har bir murojaatga eʼtibor bilan qarab, yechimini topmaguncha tinchimaydi.

Oybek MFY Milliy qadriyat koʻchasida yashovchilarni yoʻlning taʼmirtalabligi koʻpdan buyon qiynayotgandi. Masʼul idoralarga qilingan murojaatlar foyda bermadi. Yil boshida bu masalada oʻz vakiliga yuzlandilar. Ana shu murojaat ishni ijobiy tomonga burdi.   6 km. masofadagi nosoz yoʻl taʼmirlanib, asfaltlandi. Fuqarolar bundan xursand.

Tosh koʻcha ning Poytugʻ-Xaqqulobod yoʻnalishidagi chorraha piyodalar uchun anchayin xavfli edi. Ayniqsa bolalar va katta yoshdagilar yoʻldan oʻtishda qiynalardi. Aholining ayni shu masalada qilgan murojaati D.Ahmedovani tashvishga soldi.   Oʻrganish natijasida chorrahaga svetofor oʻrnatildi.

Deputatga qilingan murojaatlar qayd etilgan daftarga koʻz tashlaymiz: Ulugʻbek MFYda 700 metr masofada toza ichimlik suvi tarmogʻi tortish, Oybek MFYda yashovchi 14 nafar vaqtincha ishsiz yoshlarning bandligini taʼminlash, 20 nafar xotin-qizlarni tadbirkorlikka yoʻnaltirish, ajrim yoqasida turgan 4 ta oilani yarashtirish va shu kabi 40 dan ortiq muammolar. Hammasi ijobiy hal etilgan.  

Aholiga kommunal xizmat koʻrsatish sifatini oshirish, hududlarni obodonlashtirish va infratuzilmasini yaxshilashda 24-Milliy qadriyat okrugidan saylangan deputat Adiba Ismatova samarali ish olib bormoqda. Oʻz saylovoldi dasturida bu masalaga alohida oʻrin bergani sabab birinchi darajali vazifa sifatida qaraydi.

Tumandagi Beglar toʻpi va Marjon koʻchalarida uning aralashuvi bilan 3,2 km. yoʻlga shagʻal va shyeben qoplamasi yotqizildi. Atlaschi va Toʻrtta mahalla koʻchalarida 5,6 km. masofaga suv tarmogʻi tortilishi bilan 253 ta xonadon toza ichimlik suvi bilan taʼminlandi. Atlaschi koʻchaga 1ta yangi TP hamda 32 ta beton ustun oʻrnatilishida ham deputat faollik koʻrsatdi.

Adiba Ismatova,deputat:

-Fuqarolar qachon bir muammo bilan kelishini kutib turmaymiz. Joylarda amaldagi qonunchiligimiz va oʻzgarishlar yuzasidan targʻibot ishlarini olib borish barobarida muammolarni oʻzimiz ham aniqlaymiz. Bu borada MFYlar bilan hamkorlik ijobiy samara beryapti. Aslida xalq vakilining vazifasi ham shundan iborat.

Albatta fuqarolarning shaxsiy muammolari ham partiyadoshlarimiz eʼtiboridan chetda qolmayapti. 18-Yangizamon saylov okrugidan saylangan deputat Muhammadjon Jumaboyev faoliyatida bu keng oʻrin egallaydi. Misol uchun Sanoatchi koʻchasida yashovchi bolalikdan nogiron Bobur Xaydaraliyev tengdoshlari kabi oʻz kompyuteri boʻlishini orzu qilardi. Deputat aralashuvi bilan homiylar yordamida uning bu orzusi ushaldi. Endi u kompyuter jamlamasi bilan bilimlarini oshirmoqda.

Baynalmilal koʻchasida yashovchi imkoniyati cheklangan Xurshidbek Umarovni salomatligini tiklashligi uchun jarrohlik amaliyoti zarur. Biroq mablagʻ masalasi muammo. Bundan xabar topgan A.Jumaboyev bemorning xonadoniga kirib bordi. Yaxshi insonlarning koʻmagi bilan mablagʻ ham topildi. Oʻksik dil quvonchga toʻldi.

Yuqoridagilar izboskanlik deputatlar faoliyatining atigi bir qismi. Bugun ular kirmagan soha, hal etilmayotgan muammo qolmayapti hisob. Asosiysi, saylovchilarning ishonchi oqlanmoqda.

Akbarjon Nazarov,

“Adolat” SDP Andijon viloyat kengashi matbuot kotibi.