Muammolar joylarning oʻzidayoq bartaraf etilmoqda

Odamlarning turmush sharoitlarini oʻrganish, mavjud muammolarni aniqlash va kechiktirmasdan hal etish maqsadida bugungi kunda biz xalq bilan yuzma-yuz, joyi kelganda esa yonma-yon turib ishlashimiz zarurligini vaziyatning oʻzi taqozo qilmoqda. Hozirgi zamon talabi biz deputatlarga kattadan-katta masʼuliyatlarni yuklash bilan birgalikda, ushbu vazifalarni bajara olishimiz, deputatlik vakolatidan unumli foydalanishimiz uchun koʻplab imkoniyatlar eshigi ochilmoqda.

“Saylov okrugim hududidagi mahallalarda, qanday masalalar oʻz yechimini kutmoqda? Fuqarolarni qanday muammolar qiynamoqda?” degan savollarga javob izlab fuqarolar bilan uchrashuv oʻtkazish maqsadida mahallalarda boʻldim. Shuni taʼkidlab oʻtishim kerakki, har bir masalaning asl yechimi albatta, xalqning oʻzi bilan yuzma-yuz koʻrishganimizdagina namoyon boʻldi.

“Gʻofur Gʻulom”, “Sadriddin Ayniy” hamda “Abdulla Qahhor” MFY larida boʻlgan uchrashuvlarim davomida ham koʻplab muammolar bilan yuzma-yuz keldim. Jumladan “Gʻofur Gʻulom” MFY da 5 ta ichki koʻchalarning asfaltlashtirilmaganligi, vaholanki ushbu koʻchalarning rekonstruksiya qilinishi 2022-yilgi dasturga kiritilgan. Bu haqida 2022-yil davomida mahalla yoʻllari taʼmirlanishini kutib charchagan fuqarolar, joriy yilda ham yoʻllarni taʼmirlanmay qolinishidan xavotirda. Aynan shu 5 ta ichki koʻchalarning asfaltlashtirilishi oʻrtaga tashlangan va oʻrganilgan eng birinchi muammo boʻldi. “Abdulla Qahhor” MFY da ham 3 ta ichki koʻchalarning asfaltlashtirolmaganligi masalasi koʻtarildi.

Ushbu uchrashuvlarimiz chogʻida boshqa mahallalardan ham kelgan fuqarolarning murojaatlari tinglandi va mutasaddilar bilan birgalikda ularga yechim izlandi. Eʼtiborlisi, oʻz muammosiga yechim topish ilinjida kelgan hech bir fuqaroning murojaati eʼtiborsiz qolmadi.

“Sadriddin Ayniy” MFY da boʻlganimda, eng muhim masala jamoat transporti ekanligi aytildi, yaʼni bir necha yil avval 22, 32 va 12- raqamli avtobuslari ushbu mahalla hududidan oʻtgan, hozirda esa ushbu transportlar qatnovi toʻxtatilib, aholi yoʻl qatnoviga ancha qiynalayotgani aytildi. Aynan maktab oʻquvchilarining yoʻl qatnoviga qiynalishayotgani taʼkidlandi. Shuningdek ushbu hududda joylashgan 31-son umumtaʼlim maktab atrofidagi irrigatsiya tizimining taʼmir talabligi va shu hududlardagi simyogʻochlarning juda eski va avariya holatida ekanligi ham aytildi.

Murojaatlar yuzasidan oʻz vakolatim doirasida tegishliligi boʻyicha mutasaddi tashkilotlarga deputatlik soʻrovlari bilan murojaat qildim. Umid qilamanki savollar oʻzining ijobiy yechimini beradi. Murojaatlari eʼtiborsiz qolmagani, ularning baʼzilariga joyida yechim topilgani fuqarolarning koʻnglida ertangi kunga ishonch uygʻotdi, koʻzlaridagi quvonchlari esa menga yanada kuch va gʻayrat baxsh etdi, desam mubolagʻa boʻlmaydi.

Muhiba Bababekova,
Xalq deputatlari Samarqand shahar Kengashi deputati.