Muammolarga joyida yechim topilmoqda

Saylovchilar bilan yakkama-yakka muloqot oʻrnatish maqsadida Oʻzbekiston “Adolat” SDP Urgut tuman Kengashida partiya faollari hamda deputatlaridan iborat ishchi guruh tuzildi. Mazkur ishchi guruh tomonidan joriy yilning 11 yanvar kuni tumandagi “Gʻus” mahalla fuqarolar yigʻini, uning hududida joylashgan yuridik va jismoniy shaxslar bilan bevosita suhbatlar uyushtirilib, qonunlar ijrosi va islohotlarning amaliyoti oʻrganildi.

Oʻzbekiston “Adolat” SDP Urgut tuman Kengashi raisi Z.Abduraxmonova, tuman Kengashi deputatlari S.Axmedova, U.Abloberdiev, A.Ashrapov va partiya faollaridan iborat ishchi guruh tomonidan hududda joylashgan 15 ta xonadonlarda aholi bilan suhbatlar uyushtirildi, fuqarolarning bugungi kunda boʻlayotgan islohotlar, chiqarilayotgan farmon va qarorlar, qonunlarga kiritilayotgan oʻzgarishlar, aholining barcha qatlamiga ularning yetib borishi holatlari oʻrganildi.

Aholi murojaatlarida Davlatimiz rahbari tomonidan xalqning farovon yashashi, turmush darajasi hamda bilim saviyasini oshirish maqsadida amalga oshirayotgan beqiyos ishlardan minnatdorligini aytib oʻtdilar. Xalqimizning eng katta muammolaridan biri — elektr tizimidagi uzilishlar, bundan tashqari, qarilik nafaqasi uchun naqd pul taqchilligi borasidagi bir qator muammolarga asta-sekin yechimlar topilayotganligini taʼkidlab oʻtdilar.

Shuningdek, mazkur hududda istiqomat qiluvchi Muborak Norqulova ishsizligi tufayli oilada qator muammolar kelib chiqayotganligi yuzasidan amaliy yordam soʻrab qator tashkilotlarga murojaat qilgan edi.

Ushbu masala yuzasidan partiya faollaridan iborat ishchi guruh tuman bandlikka koʻmaklashish markazi rahbariga murojaat qildi va markazi rahbari bilan hamkorlikda Muborak Norqulova “Gʻus” Oilaviy poliklinikasiga hamshira vazifasiga ishga qabul qilindi.

“Adolat” SDP Samarqand viloyat kengashi

 Matbuot xizmati