Muammolari bartaraf etilsagina saylovchi rozi boʻladi

Oliy Majlisi Qonunchilik palatasi deputati M.Qurbanbayevning navbatdagi uchrashuvi Yangiariq tumanidagi saylovchilari bilan boʻlib oʻtdi.

Deputat yetakchiligidagi faollar tuman markazida faoliyat olib borayotgan “Dehqon bozori”dagi narx-navo hamda aholiga yaratilgan shart-sharoitlar bilan tanishdi. Sotuvchi va xaridorlar bilan dildan suhbatlashdi, suhbatdoshlar yaratilgan sharoitlardan rozi ekanliklarini bildirishdi.

Shundan soʻng, tuman tibbiyot birlashmasiga qarashli 60-sonli   Oilaviy poliklinika faoliyati bilan yaqindan tanishildi. Yaratilgan imkoniyatlar, muolaja xonalarini, isitish qozonxonasini kuz-qish mavsumiga tayyorgarlik darajasi oʻrganildi.

Shundan soʻng deputat va faollar tumandagi Kattabogʻ qishlogʻi hududida joylashgan 4-sonli  maktabgacha taʼlim tashkilotiga borib,  oʻrganish ishlari olib bordi.

Deputat bilan oldingi uchrashuvlardan birida, muassasa mudirasi Marhabo Abdrimova bogʻchaning atrofini toʻsiq devor bilan oʻrash masalasi boʻyicha murojaat qilgan edi. Murojaat deputatning saʼy-harakatlari bilan ijobiy hal etilib, hozirgi kunda muassasa atrofi temir panjara bilan oʻrab olinganidan xursand boʻlgan jamoa deputatga minnatdorlik bildirdi.

Shuningdek, muassasa oshxonasiga ovqat pishirish uchun elektr pechka zarurligini ham aytib, deputatdan amaliy yordam soʻrashdi. Mazkur muammo yuzasidan deputat shu vaqtning oʻzida hamrohlik qilayotgan tuman Moliya boʻlimi vakillariga murojaat etdi va kelishgan holda, muassasa pechka bilan taʼminlanadigan boʻldi.

Deputat uchrashuvlari davomida Prezidentimizning Oliy Majlis va Oʻzbekiston xalqiga yoʻllagan Murojaatnomasining mazmun va mohiyati, unda ilgari surilgan ilgʻor gʻoyalarning barchasi inson qadrini asrab-avaylashga qaratilgani toʻgʻrisidagi fikr va mulohazalari bilan oʻrtoqlashdi.

Saylovchilarning qiziqqan savollariga hayotiy, asosli javoblar bilan atroflicha tushunchalar berildi.

Bir soʻz bilan aytganda, deputat yetakchiligidagi faollar tashkilot, muassasalarning faoliyatidagi kamchilik va muammolar bilan yaqindan tanishib, xonadonma-xonadon yurib, muammolarni yechimini topishga erishilayotgani saylovchilarni oʻz hayotidan rozi boʻlib yashashi orqali Yangi Oʻzbekistonimizni barpo etishga boʻlgan ishtiyoqini yanada ortishiga sabab boʻlmoqda.

Zamira ABDULLAYEVA,
“Adolat” SDP Xorazm viloyat kengashi matbuot kotibi