Muhim jarayonlarda faol boʻlaylik!

Bugun Oʻzbekiston “Adolat” SDP Qashqadaryo viloyat Kengashining IX-plenumi boʻlib oʻtdi. Unda mahalliy Kengash deputatlari, partiya faollari, shahar, tuman Kengashlari raislari, faxriylar, ommaviy axborot vositalari vakillari qatnashdi.

Plenumda Oʻzbekiston “Adolat” SDP Qashqadaryo viloyat Kengashining 2022-yildagi faoliyati yuzasidan hisoboti va 2022-2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili” da amalga oshirishga oid davlat dasturidan kelib chiqadigan 2023-yildagi ustuvor vazifalari toʻgʻrisida partiya viloyat Kengashi raisi Ruiddin Raupov maʼruza qildi.

Oʻtgan yili viloyat partiya tashkilotlari tomonidan birmuncha ishlar amalga oshirildi,- dedi Ruiddin Raupov.- Xususan, yil davomida partiya tashkilotlarimiz tashabbusi bilan “Siyosiy-huquqiy bilimlarni mustahkamlash – demokratik jamiyat poydevori” loyihasi muntazam oʻtkazib kelindi. Partiyamiz faollari tomonidan 484 marotaba siyosiy oʻquvlar tashkil etilib, 4744 nafar ishtirokchilar qamrab olindi. Mazkur tashkil etilgan siyosiy oʻquvlarni ommaviy axborot vositalari orqali 59 marotaba yoritilishiga erishildi. Shuningdek, haftaning har chorshanba kuni partiyaning har bir tuman, shahar Kengashlarida partiya faollari va deputatlaridan iborat ishchi guruhlari tuzilib, mahalla fuqarolar yigʻinlarida saylovchilar bilan uchrashish maqsadida “Muammo bilan yuzma-yuz” loyihasi asosida uchrashuvlar tashkil etildi. Asosiy maqsad Prezidentimiz alohida taʼkidlayotganlaridek, odamlarni rozi qilishga eʼtibor qaratildi. Faoliyatimizda albatta yutuqlar bilan birga kamchiliklarga yoʻl qoʻyildi. Endi joriy yilda barcha eʼtibor va kuchlarimizni mamlakatimizda adolatli jamiyat barpo etishga sarflaymiz. Notiq, birgina oʻtgan yili partiyaning ishchi guruh aʼzolari tomonidan 512 ta mahalla fuqarolar yigʻinidagi 1306 ta xonadon va 210 ta xoʻjalik yurituvchi subyektlar oʻrganilgani, uchrashuvlar mobaynida aholi tomonidan 214 ta murojaat kelib tushib, ular yuzasidan 62 ta mutasaddi tashkilotlarga deputatlik soʻrovlari yuborilganini alohida qayd etdi. Natijada,
56 ta masala oʻz ijobiy yechimini topdi. 31 dan ortiq murojaatlar mutasaddi idoralarni jalb etish orqali joyida hal etildi. 65 ga yaqin murojaatlarga huquqiy maslahatlar berilgan.

Mazkur tashkil etilgan muloqotlar ommaviy axborot vositalari orqali
35 marotaba yoritildi. Bundan tashqari, partiya viloyat Kengashi tomonidan 53 ta turli mavzudagi tadbirlar oʻtkazilib, ularda 5640 nafar kishi qatnashdi.

Ayni paytda viloyat partiya Kengashi saflarida 50 mingdan ortiq aʼzolar uyushgan. 300 dan ortiq BPT lar faoliyat yuritmoqda. Plenumda mamlakatimiz ijtimoiy siyosiy hayotida kechayotgan barcha islohotlarda partiya aʼzolari faol ishtirokini taʼminlash zarurligi yuzasidan koʻrsatmalar berildi.

Plenumda Oʻzbekiston “Adolat” SDP ning xalq deputatlari viloyat Kengashidagi deputatlik guruhining 2022-yildagi faoliyati yuzasidan hisoboti va 2023-yildagi vazifalari toʻgʻrisida Ruiddin Raupov, 2022-yilgi ustav faoliyatini moliyalashtirish uchun ajratilgan davlat mablagʻlari va byudjetdan tashqari mablagʻlarining ijrosi hamda 2023-yil byudjetining asosiy koʻrsatkichlari boʻyicha axboroti toʻgʻrisida kengash bosh hisobchisi Malohat Samiyeva hisoboti tinglandi.

Anjumanda partiya hayotiga oid boshqa masalalar ham koʻrib chiqilib muhokama qilindi. Mamlakatimiz hayotidagi muhim oʻzgarish Yangi Oʻzbekistonning Yangi Konstitutsiyasi loyihasi targʻibotiga bagʻishlab partiya tashkilotlari tomonidan uyushtirilayotgan ommaviy siyosiy tadbirlarda va 30-aprel kuni boʻlib oʻtadigan referendumda faol ishtirok etishga daʼvat etildi.

Plenumda koʻrilgan barcha masalalar yuzasidan tegishli qarorlar qabul qilindi.

Doston Nusurov,
"Adolat" SDP Qashqadaryo viloyat Kengashi
yetakchi mutaxassisi.