Murojaat deputat koʻmagi bilan oʻzining ijobiy yechimini topdi

Xalqimizda “Oʻt balosidan asrasin” degan gap bor. Negaki, tilsiz yov boʻlgan yongʻin chek-chegara bilmaydi. Soniyalar ichra misqollab yigʻilgan mol-mulklarga yopirilib, ularni kulga aylantiradi. Eng yomoni, uning ayanchli oqibatlarida qanchadan qancha insonlar hayotiga xavf tugʻdiruvchi jiddiy tan jarohatlarini olishi mumkin.

Toshkent viloyati Yangiyoʻl tumani, “Nurobod” mahallasida istiqomat qiluvchi fuqaro Shohista Abdurazzoqovaning uyida ham mana shunday noxush hodisa yuz berdi. Izgʻirin qish kunlarida xonadonida kelib chiqqan yongʻin tufayli farzandlari bilan koʻchada qolgan fuqaro xalq vakili Oliy majlis Qonunchilik palatasi deputati, “Adolat” SDP fraksiyasi aʼzosi Dilrabo Xalbayevaga oʻzining ahvolini bildirib, amaliy koʻmak soʻrab, murojaat qildi.

Murojaatchini diqqat bilan tinglagan deputat uning xonadoniga tashrif buyurib, hodisa sabablarini sinchiklab oʻrgandi.

Xonadondagi isitish pechi nosozligi ortidan kelib chiqqan yongʻin natijasida yashash uyining tom va ichki qismi, uy jihozlari butkul zararlanganiga guvoh boʻlgan deputat uy egalariga beminnat koʻmak qoʻlini choʻzdi.

Deputatimiz xonadon sohiblari va ularning bolalariga zarar yetmaganligi katta baxt ekanini taʼkidlab, murojaatchining roʻzgʻori uchun zarur boʻlgan koʻrpa-yostiqlar, farzandlari uchun oziq-ovqat, kiyim-kechaklar borasida yordam berdi.

Xalq vakili Dilrabo Xalboyeva voqea joyida Yangiyoʻl tumani hokimi bilan telefon orqali bogʻlanib, yongʻindan talafot koʻrgan murojaatchi va farzandlarini “Umid” MFYda joylashgan xonadonlardan biriga vaqtinchalik joylashtirish haqida maslahatlashdi.

Biroq, fuqaro Shohista Abdurazzoqova taklif etilgan joy farzandlarining maktabga qatnashi uchun noqulayliklar tugʻdirishini bildirib, uni rad etarkan, oʻz hovlisida joylashgan kichkina oshxonani taʼmirlab, chiroq oʻtkazib berishni iltimos qildi.

Fuqaroning haqli taklifini qabul qilgan deputat tuman elektr tarmoqlari korxonasi rahbari bilan muloqot qilib, oshxonasiga elektr tarmogʻi ulab berildi.

Uyning taʼmirlash ishlari uchun homiy tadbirkor tomonidan 150 dona shifer ajratilib, oshxona deraza romlari esa “akfa” rusumidagi zamonaviy romlarga almashtirib beriladigan boʻldi.

Shuningdek, mahalla jamgʻarmasi tomonidan ham moddiy pul mablagʻi, oziq-ovqat mahsulotlari berildi.

Jonkuyar deputat koʻmagi bilan uyni taʼmirlashda amaliy yordam soʻrab qilingan murojaat ham oʻzining ijobiy yechimini topdi.

Hududdagi boshqa qator muammolar ham deputat tomonidan nazoratga olindi.

Oʻzbekiston “Adolat” SDP

Toshkent viloyati Kengashi Matbuot xizmati.