Mustahkam oila jamiyat gultoji

Insonning qadr-qimmati va hurmati yuksalishiga, kishining bu dunyodagi oʻrni va obroʻyini oshishga qaratilgan maqsadlar, islohotlar darajasiga olib chiqilayotgan bugungi kunda yurtimizda oilalarning jipsligi, mustahkamligi kun tartibimizda boʻlib, yoshlarga oila qurish, uning masʼuliyati, farzandini barkamol inson sifatida voyaga yetkazish sir-sinoatini oila qurish ostonasida turgan yoshlarga yetkazishimiz, oilalarning mustahkamligi, baxti eʼtiborda ekanini chin dildan his etishimiz kerak.

Agar ikki yosh oila qursa va ularning hali koʻngil yaqinligi, kelin-kuyovlikning ulugʻ masʼuliyati yuzaga kelmagan boʻlsa, ularga bir-birini qanday hurmat qilishni, oilani murakkab sharoitlarda ham saqlab qolish malakasini shakllantirishni ularga uqtirib borishimiz lozim. Bu hayot, oilada ham turli vaziyatlar boʻladi. Yoshlar hali turmush tashvishlari, oilaviy masalalar, iqtisodiy muammolar nima ekanini toʻliq anglab yetmasdan oila qurishsa, ularga bu narsalarni anglashi uchun ancha vaqt kerak boʻladi. Oilaning muqaddas rishtalariga darz yetmasligi uchun yoshlar mafkuraviy jihatdan ham mukammallikka intilishi zarur. Oila begona koʻzlardan saqlab turiladigan makon, oila bir qoʻrgʻonki, oiladagi har bir gap, har bir ish kelishuvga, hamfikrlikka asoslanishi kerak boʻladi.

Bugungi kunda turmush qurish ostonasida turgan yigit va qizlarimiz uchun ham oila mustahkamligini saqlashda, muqaddas qoʻrgʻonni yanada yuksaltirishda yoʻriqnoma boʻla oladigan kitoblar juda koʻplab topiladi. Yoshlar bu kitoblarni uqib, oʻqib olishsa oʻzlari uchun foyda. Zero, maqsad, fikr, niyat, orzu, maslak bir boʻlsa, oilada er-u xotinning kayfiyati ham joyida boʻladi. Bunday oiladan barkamol insonlar yetishib chiqadi. Nikoh ikki yoshning koʻngil va ruh birligidir. Shunday ekan, yoshlarga yaxshi yoʻl oʻrgataylik. Ularning nikohini mustahkamlashga hissa qoʻshaylik. Bu ish savobli ish hisoblanadi.

Muhiba Sayfiddinova

Xalq deputatlari Samarqand shahar Kengashi deputati.