Mustaqil Oʻzbekistonda ulugʻdir inson

Romitan tumanidagi 3-DMTTda “Adolat” SDP Romitan tuman Kengashi tomonidan “Yangi hayot uchun, Yangi Oʻzbekiston uchun” shiori ostida davra suhbati tashkil etildi.

Tadbirda tuman Kengashi raisi Raxmatillo Xayitov, xalq deputatlari tuman Kengashi deputati Laylo Avezova va muassasa xodimlari ishtirok etishdi.

- Iftixor— faxrlanish, maqtanish, gʻururlanish, shon-sharaf hissi, deganidir. Yurtning   mustaqilligi, tinchligi esa faxrlanishning eng yuksagidir.

Mustaqillik qalblarga surur, dillarga quvonch baxsh etadigan moʻtabar soʻz. Mustaqillik biz uchun milliy davlatchiligimizni, oʻzligimiz, insoniy haq-huquq va qadr-qimmatimizni tiklash,   urf-odat va anʼanalarimizni, muqaddas islom dinimizni, buyuk ajdodlarimizning tabarruk   nomlarini ulugʻlash, sogʻlom va barkamol yangi avlodni shakllantirish boʻyicha ilgari tasavvur   ham qilib boʻlmaydigan beqiyos imkoniyatlar eshigini ochib berdi-deydi tuman Kengashi raisi Raxmatillo Xayitov oʻz maʼruzasida.

Darhaqiqat xalqimiz asrlar davomida intilib yashagan va kurashgan, “mustaqillik” degan bebaho neʼmatning qadr-qimmatini yosh avlodning teran idrok etishi, oʻtgan davr mobaynida bosib oʻtgan ogʻir va mashaqqatli, ayni vaqtda sharafli yoʻlimiz, keng koʻlamli islohotlarimiz, qoʻlga kiritgan ulkan yutuqlarimizning tub mohiyati va ahamiyatini bugun barchamiz yaxshi anglaymiz.  

Muxtasar qilib aytganda, biz kecha kim edig-u bugun kim boʻlganimizni anglatish, yurtimiz ahlini yangi marralar sari ruhlantirish maqsadida “Insonni ulugʻlash va sifatli taʼlim yili” degan bosh gʻoyani oʻzida mujassam etgan. Vatanimiz mustaqilligining 32 yillik tantanalari gʻoyat koʻtarinki ruhda qarshi olinmoqda. Bu albatta, bejizga emas. Yurtimizda hukm surayotgan tinchlik neʼmati, qoʻlga   kiritilgan istiqlol bizga mana shunday ulugʻvor bayram nashidasini surish, uni dillarda surur bilan nishonlash, u bilan faxrlanish baxtini berdi.

Eng asosiysi, Prezidentimiz taʼkidlaganlaridek, xalqimizning dunyoqarashi, ong-u tafakkuri, hayotga, mehnatga, yon-atrofga munosabati oʻzgardi. Bu ularning bugungi intilish-izlanishlarida, oʻz hayoti va turmushini yanada goʻzal qilish, Vatan ravnaqiga munosib hissa qoʻshish yoʻlidagi saʼy-harakatlarida koʻrinmoqda.

Tadbir yakunida partiya faollari ishtirokchilarni bayram bilan muborakbod etib, kelgusidagi ishlariga omadlar tiladilar.

Mohigul Rahimqulova,

“Adolat” SDP Buxoro viloyat Kengashi matbuot kotibi.